ආනන්ද හාමුදුරුවෝ

සම්බුදු පියාණන් මහ සඟ රුවන ඇමතුවා
තව තෙමසකින් පිරි නිවනට යන බව දෙසුවා
ආනන්ද හිමියන් ඉකි බිඳමින් වැළපෙනවා
අප තනි කර නොයනු මැනවි ඉල්ලා සිටියා

බුදුහිමි ලොවේ අනියත ගැන දම් දෙසුවා
ප්‍රියයන්ගෙන් වෙන් වෙන බව තේරුම් කෙරුවා
ආනන්ද හිමි සිත බුදු හිමි සැදුවා
ලොවේ සියලු දේ අනියත බව කීවා

ලොවම එළිය කළ පහන නිවුණා
ආනන්ද හිමියන් වීරිය වැඩුවා
උතුම් දහම් ගඟ අවබෝධ වූවා
අරහත් ධජයේ රහත් බව ලැබුවා

හර්ෂ මෙවන් කිවිදු
දංකොටුව – දික්වෙල

****

දසපෙරුම් දම් පුරා සසරේ

දසපෙරුම් දම් පුරා සසරේ
එළිය දුටුවා අවිදු අඳුරේ
තුන්ලොවක් දිනූ සෑසි සමිඳෙ
මහිමි සිරිපා වඳිමි නිබඳෙ //

සුපිපි සල්මල් ලුම්බිණී යේ
සත් පියුම් පිට වැඩිය දිනයේ
ලොවම ඒකාලෝක වූවා
ලොව්තුරා සම්බුදු පියේ //

නිමක් නොපෙනෙන සසර කතරේ
කෙලෙස් පරදා ජයක් ලැබුවේ
පහන් ටැඹ සම්බුදු සමින්දේ
එළිය විහිදූ සමිඳු වන්දේ //

විශ්‍රාමික පාඨශාලාචාරිනී
ජේ.ඇම්. ඊ.සිරිවර්ධන මිය

****

දළදා පෙරහර

කස පුපුරණ හඬ
ඩෙංකුටු බෙර හඬ
ඇතාට පාවඩ
කරඩුව පිට උඩ

සෙංකඩගල පුර
ඒකාලෝක කර
සිත මන්මත් කර
දළදා පෙරහර

පුද දෙන දෙව් නර
දළදා ගම් බිර
සිත තැන්පත් කර
වඳිනෙමු පින් බර

පන්දම් ඇවිලෙයි
නිලමේවරු යති
කොඩි සේසත් ඇති
පෙරහර බැබළෙයි

අජිත් වික්‍රමනන්ද වීරසූරිය
මොරගොල්ල
ඉඹුල්ගස්දෙණිය

****

පමාවේ බිය

දස සිල් ද අට සිල් ද පංචශීලය ද ගෙන
සිල්වතුන් සෑ මලුවෙ නිදිකිරා වැටෙන විට
මුහුකුරා ගිය තරම තුන් කුදුව සිටිනු දැක
කරුණක් සිත දැනුණි ප්‍රමාදයෙ දරුණු දුක

ගාමිණි ජයලත් තැල්දෙන
හාලිඇල

****

උතුම් මොහොත

රන් හිරු මඬල පායා
ගයා හිස දිළුණා

දහම් රන් කෙඳි
නැඟී විහිදී පෙනුණා
දස මරුන් පලා ගොස්
සැඟව වන වැදුනා

සැදැහැ සිත් ඇති
දෙවි බඹුන්
සමිදු සිරිපා මත
විගස වැඳ වැටුණා
මහබෝ මලුව පාමුල
බුදු වදන් ඇසුණා

මාස්පොත ධම්මජෝති හිමි
මීරිගම

****

මට නොකියම එයා ගිහිං

බවුන් වඩන්නට
ගියේ වෙහෙර ගෙට
දෝත් දෝවලා
පා වැසුම් ගලවලා

දැහැන්ගතව සිටි කාලේ
නිහඬතාව ඇති වේලේ
මගෙ දැහැනින් ඔබට ලැබුණ
එර්ධි බලය හරි පුදුමයි

වැලිපත පඤ්ඤානන්ද හිමි
වළවේ ශ්‍රී දේවරක්ඛිතාරාමය
දම්වැල්ඕඩය කොටවෙහෙරමංකඩ
බළන්ගොඩ

****

නිකිණි පෝදා

සම්බුදු හිමිගෙ උපස්ථායක කමකින් ද
පුද ලැබ දහම් රස විඳගත් සිහිනෙන් ද
අද වැනි දිනක වටහා සදහම් කන්ද
අරහත් බවට පත්විය හිමි ආනන්ද

මහරජු අජාසත් පෙරමෙන් නොවුණි හොඳයි
දැන් දිවි ගෙවන්නේ ඉමිහිරි දහම මැදයි
සදහම රකින්නට ඔහු රජ බලය යොදයි
පළවැනි දහම් සංගීතිය තිබුණෙ අදයි

මේ ලක් දිවෙහි ඉතිහාසය බැලූ කල
හමුවුණි තොරතුරක් සදහම ළඟා කළ
ලලාට ධාතු තැම්පත් කර අමා බල
දාගැබ හැදුණු පින්බර සේරුවාවිල

අද වැනි පොහොය දිනයක් ගැන ඇත අදහස්
මහ සඟ රුවන සසරින් විය යුතු නිදහස්
මඟ හැරුණි නම් යම් හිමි නමකට පෙරවස්
අවසර ඇත සමාදන් වන්නට පසුවස්

පව් වැඩ කියන්නේ බැලුවම වස විෂය
පින්කම් කළොත් නැඟුමට හැක ජය ගොසය
වස්තුන් මාසය ම බොදු දනහට රසය
පුද දිය හැකි ය සඟ රුවනට සිව්පසය

වේලිඔය සිරි වජිර හිමි
සිරිමහ මිහිඳු පිරිවන
වාද්දුව

****

මම සොත්තිය බමුණා වෙමි

සිත දුක් නිවාලන මඟ
කියාදෙන බුදු හිමියනේ
එදා බෝ මැඬ වෙතට
පිය නඟනා හිමි දෝතට
කුස තණ අට මිටක් දුන්න ආජීවක මම වෙමි
දුකින් පෙළෙන ලෝසතුනට
පිහිට වන බවක් ඇසුවෙමි
සුනීත සෝපාක වගේ
අයටත් පිහිටක් වූවා
කුස තණ කපමින් දිව රෑ
මම තවමත් අතරමඟ ය
හදවත බෝමැඩක් කරමි
කුස තණ අතුරා සරසමි
දිව රෑ ඇරයුම් කරනෙමි
දම් රජුනේ වැඩිනු මැනවි,

බිබිලේ ධම්මසිරි හිමි
කජුවත්ත ආරණ්‍ය සේනාසනය
දෙහිඅත්තකණ්ඩිය

****

සැම සිත් සැනසේවා

බුදු ගුණ බලයෙන් කුස ගිනි කුස් සැනසේවා
දම් ගුණ බලයෙන් දන හද ගින්න නිවේවා
අරහත් සඟ ගුණ බලයෙන් සිත් සැනහේවා
තෙරුවන් ගුණ බලයෙන් ලක්මව වොරැඳේවා

පසිඳු මිහිරාන්
රැටියල

සංස්කරණය
දීපා පෙරේරා