චිරං ජයතු නාහිමි විමල නැණ

සම්බුදු සසුන වෙනුවෙන් දිවිය කැප කොට
හිමි ශාසනයට වැස්සක් වෙමිනි කතරට
නිම් නැති සේවයක් රට දැයට සිදුකොට
සව් පූජිත සමිඳ නව පදවි හිමිකොට

ලක්දිව වයඹ හත්පත්තුවෙහි දඹදෙණි
ලක්දිව දෙවැනි නායක පදවි සමිඳුනි
මෙත් සුව විමල නැණ ගුණ හැඳින ඇසුරෙනි
සෙත් සුව පතමු සිත් තුළ පිරුණු බැතියෙනි

නදියක් සේ ගලා යන සා පවස නිවා
දිවියක් ගෙවන සමිඳුනි සිත් සුවය දෙවා
සුවඳක් සේ උතුම් වූ සිල් සුවඳ මවා
දවසක් නෑර වැජඹෙනු මැන දිවිය ගෙවා

පන්සල් දහම් පාසල් ඉදිකර දැයට
පෙන් වන සුමග පිය ඔසවන ඉදිරියට
පින්සර නා සමිඳ පත් නව පදවියට
රන් සලකුණකි ඔබ හැම උදයට රැයට

තුරන් කර අඳුර සඳ ලෙස එළිය දෙන
සුරන් ගෙන් පවා කියැවී හිමිගෙ ගුණ
කරන්නට තවත් සේවය දිරිය ගෙන
චිරං ජයතු නව නාහිමි “විමල නැණ”

මහාචාර්ය දර්ශන රත්නායක
කැලණිය විශ්ව විද්‍යාලය