නවම් පොහොය වර්ණනාව
නවම් පොහොය පිළිබඳ දැනගන්න
පොහොය වරුණ සමඟින් එක්වන්න
සිත පහදාගෙන දෙසවන් දෙන්න
සිතට දැනෙන ලෙස සාධු කියන්න
මුළු බුදු සසුනම ඔද තෙද ය
කෝලිත උපතිස්ස ද හරි හොඳ ය
සැරියුත් මුගලන් ලෙස දී ධජය
අගසව් තනතුරු දුන් දින අදය
සසුනට වස් විස්සක් ගත වූවා
ඔවාද පාතිමොක්ෂය හිමි දෙසුවා
සදහම රැකුමට මුල් විය ඒවා
බුදු දම චිරාත් කල් ලක සුරැකේවා
සතර ඉද්ධිපාද වැඩුවන්හට
කල්ප ගණන් වුව හැකි වෙයි ඉන්නට
අනඳ හිමිට බැහැ තේරුම් ගන්නට
සිදුවිය බුදු සමිඳුට සමු ගන්නට
බුදුහිමි ආයුෂ අතහැර දාලා
අනඳ හිමිට පැවසුව කැඳවාලා
ඒ පිළිබඳ හරි හැටි වැටහීලා
අනඳ හිමිට බැහැ ඉනු ඉවසාලා
මේ ලෙස නවම් පොහොය වැදගත් වේ
සිරි සදහම් ඇහුවම මන මත් වේ
තුන් රුවනින් සැනසීම ම අත්වේ
මතු අප සැම අම නිවනට පත්වේ
වේලිඔය සිරි වජිර හිමි |
