ඉල් පොහොය වර්ණනාව
 දන් සිල් බවුන් වඩමින් තම දිවිය සදයි
යන්නට අරි අටඟි මඟ තම දිරිය යොදයි
පින්වත පින්වතිය ඉල් පොහො දිනය අදයි
මින් පෙර නොදත් එහි තතු දැන ගැනුම හොඳයි
සව් ලෝ සතුන් හට දෙන්නට සැනසීම
මෙත් බෝ සතුන් මතු සිදුවෙයි බුදුවීම
ගෞතම බුදුසමිඳු ඒ ගැන ඇගයීම
අද වැනි දිනක සිදුවිය විවරණ දීම
වටහා දී ලොවෙහි පවතින අසාරය
සඟ සැට නමට පෙන්වා දී විචාරය
සතහට බෙද බෙදා සදහම් තුෂාරය
සිදුවිය පළමු සිරි සදහම් ප්‍රචාරය
මිසදිටුවන් සොයා නිතර ම ගමනෙ යෙදී
බුදුහිමි කළ මෙහෙය කියුමට වචන මදී
උරුවෙල් දනව්වෙ දි අද වැනි දිනයක දී
තුන් බෑ ජටිලයන් දමනය කරන ලදී
සැරියුත් හිමිගෙ මව විය බැමිණිය සාරී
මිස දිටු බවින් තිබුණලු හදවත සීරී
අස අස තම පුතා දෙසූ සදහම් මීරී
හිමි පිරිනිවන් වැඩියා තිබූ පින මේරී
හැම වෙහෙරක ම වෙන පින්කම් සමුදායයි
පැරකුම් රජුන් කළ කඨිනය සිහිවීයයි
මේවා දකින්නට මෙන් පුන්සඳ පායයි
අද පසුවස් පවාරණ ඉල් පුන් පෝයයි
සමිඳුගෙ දකුණු අකු ධාතුන් නිධන්කර
සැදූ ථූපාරාමෙ දිදුලයි හැඟුම්බර
පළවැනි වෙහෙර එය විය සැකයකින් තොර
බැලුවම ඉල් පොහොය දිනයකි සුපින් බර
 වාද්දුව සිරිමහ මිහිඳු පිරිවෙනේ
මොල්ලිගොඩ දෙගම්බද මහා විහාරයේ
වේලිඔය සිරි වජිර
පොඩි හාමුදුරුවෝ |
