යාපහුව පුරවරයට ආලෝකයක් වූ
මහව උඩගම
ශ්‍රී ඉන්දසුමන මහ පිරිවෙන් විහාරස්ථානය
ප්‍රවීණාචාර්ය ප්‍රවචන කීර්ති ශ්‍රී ලේඛන ශාස්ත්‍රී
ගලගෙදර රතනවංස හිමි
" මහව උඩගම ශ්‍රීඉන්දසුමන මහ පිරිවෙන් විහාරස්ථානය පිහිටා තිබෙන්නේ ඉතා මනරම් භූමි
භාගයක ය. මහව ප්‍රධාන දුම්රියපළට ආසන්න ව පිහිටා ඇති පිරිවෙන් විහාරස්ථානය තුළ
මනරම් වැව් පොකුණක් මධ්‍යයේ මුචලින්ද නාග දරණ මත බුද්ධ ප්‍රතිමා වහන්සේ තේජසින් වැඩ
වසන ආකාරය කාගෙත් සිත් නෙත් ඇඳ බැඳ තබන්නකි."
|
වර්තමාන කෘත්‍යාධිකාරී
රැකෝගම සිරිනිවාස
නායක ස්වාමීන් වහන්සේ |
කුරුණෑගල දිස්ත්‍රික්කයේ ඓතිහාසික යාපහුව පුරවරයේ කටුවන්නා කෝරළයේ මහව ප්‍රාදේශීය
ලේකම් කොට්ඨාශයේ මහව උඩගම ශ්‍රී ඉන්දසුමන මහ පිරිවෙන් විහාරස්ථානය පිහිටා තිබේ.
1995.05.10 දී ආරම්භ කරන ලද ඉහත පිරිවෙන් විහාරස්ථානයේ නිර්මාතෘ වන්නේ දැනට අනූපස්
වැනි වියෙහි පසුවන පිරිවෙන් විහාරස්ථානය ප්‍රමුඛ එම සියලු විහාරස්ථානයන්හි අධිපති,
වන්නි දෙමළ හත්පත්තු දෙකේ සංඝනායක බළල්ලේ ශ්‍රී පඤ්ඤාලෝකාභිධාන නායක නාහිමිපාණන්
වහන්සේ යි. උන්වහන්සේ සියලු වගකීම් තම වැඩිමල් ශිෂ්‍ය වූ ශ්‍රී ඉන්දසුමන පිරිවෙනෙහි
වර්තමාන කෘත්‍යාධිකාරී රැකෝගම සිරිනිවාස නායක ස්වාමීන් වහන්සේට පවරා දැනට වලස්සෑගල
පුරාණ විහාරස්ථානයෙහි විවේක සුවයෙන් වැඩ වෙසෙති.
පිරිවෙන් විහාරස්ථානය ප්‍රමුඛ සියලු විහාරස්ථානයන්හි වගකීම් කරට ගෙන ඒවා පිළිබඳ
සොයා බලා කටයුතු කරන්නේ රැකෝගම සිරිනිවාස නායක ස්වාමීන් වහන්සේ යි. උන්වහන්සේ
පිරිවෙන් විහාරස්ථානයෙහි වැඩ වෙසෙමින් ශිෂ්‍ය ස්වාමීන් වහන්සේලාගේ ත්, දායක
පින්වතුන්ගේ ත් සියලු වගකීම් නොපිරිහෙලා ඉටු කරති. මහව උඩගම ශ්‍රී ඉන්දසුමන මහා
පිරිවෙන අධ්‍යාපන අමාත්‍යාංශයේ පවා ප්‍රසාදයට ලක් වූ පිරිවෙනකි. කුඩා ස්වාමීන්
වහන්සේලා 40කට අධික සංඛ්‍යාවක් වැඩ වසන එම පිරිවෙනෙහි දෛනික සියලු කටයුතු කාල
සටහනකට අනුව සිදු වේ. ඒ අතර සුවිශේෂී සිද්ධියක් ලෙස දවසට තුන් වතාවක් බුද්ධ වන්දනාව
සිදු කිරීම පෙන්වා දීමට පුළුවන. ප්‍රදේශවාසී සැදැහැතියන්ගේ සියලු ආගමික කටයුතුවලට
පිරිවෙන් විහාරස්ථානයෙන් සිදුවන අනුපමේය මෙහෙය ඉතා විශාල ය. ඒ සියලු කාර්යයන් සඳහා
නායකත්වයත්, අනුශාසකත්වයත් ලබා දෙන්නේ වර්තමාන පිරිවෙන් කෘත්‍යාධිකාරි රැකෝගම
සිරිනිවාස නායක ස්වාමීන් වහන්සේ යි. උන්වහන්සේගේ වැඩපිළිවෙළ අගය කරමින් සැදැහැති
දායක පින්වතුන් හා ප්‍රදේශවාසී පින්වතුන් නිරතුරුව ම විහාරස්ථානයට පැමිණෙති.
ශ්‍රද්ධා සිතින් ආගමික වතාවත්හි නිරත වෙති. උන්වහන්සේගේ අවවාද අනුශාසනා ලැබ යහපත්
ජීවිත ගත කරති.
මහව උඩගම ශ්‍රී ඉන්දසුමන මහ පිරිවෙන් විහාරස්ථානය පිහිටා තිබෙන්නේ ඉතා මනරම් භූමි
භාගයක ය. මහව ප්‍රධාන දුම්රියපළට ආසන්න ව පිහිටා ඇති පිරිවෙන් විහාරස්ථානය තුළ
මනරම් වැව් පොකුණක් මධ්‍යයේ මුචලින්ද නාග දරණ මත බුද්ධ ප්‍රතිමා වහන්සේ තේජසින් වැඩ
වසන ආකාරය කාගෙත් සිත් නෙත් ඇඳ බැඳ තබන්නකි.
සැදැහැවතුන්ගේ දහම් පවස නිවීමට තෝතැන්නක් වූ පිරිවෙන් විහාරස්ථානය සැදැහැවතුන්ට
පින් කිරීමට සුදුසු ම පුණ්‍ය භූමියකි.
 |
පිරිවෙනේ නේවාසික ශිෂ්‍ය භික්ෂූන් වහන්සේ |
|
