පුතුගේ නමට
මා බත සරි කළේ මේ ඉඩමයි හේනේ
පූජා කරමි එය අපෙ හාමුදුරුවනේ
මා පුතු වළඳාපු සඟ බත් ඇට ගානේ
හැම පව් ගෙවී සැනසේවා නිර්වාණේ
පැවිදි ව කුඩා කල සිවුරට ඇති ආසා
තුරුණුව වැඩී එන විට නැති වුණෙ කෙලෙසා
නොහොබිනකම් කළත් සැමගේ දෑස් වසා
අතහැර දමනු බැහැනේ මගෙ පුතා නිසා
කළ පවු කියා දෙස් තැබුවත් ලොවම මට
අංගුලිමාල වුව ආවේ මගෙ කුසට
නෑවිත් සිටිය මුත් මුළු ගම මලගමට
යුතුකම ඉටු කළා මම පුතුගේ නමට
තලල්ලේ චන්දකිත්ති හිමි |
