බුදු පියාණෙනි

නෙත රැඳි කලට අපමණ සැනසුමක් ගෙනා
සිත බැඳි දනට අමයුරු සිසිලසක් දෙනා
සත වෙත පතළ කළ කරුණා ගුණය මනා
නැත අන් සරණ තිලොවග හිමි සරණ විනා

සචිත්ත රත්නායක
ඔක්කම්පිටිය

වෛරසය ඇවිදින්

බුදුන් වැඩ සිටි සමයේ
විශාලා මහනුවර
මහා වසංගත රෝ බියකින්
මිනිසුන් දහස් ගණනක් මැරුණා

අදත් ඒ ලෙසින්
කොරෝනා වෛරසය ඇවිදින්
ලක්ෂ ගණනක් ලොවේ
මිනිසුන් දුකෙන් මිය ඇදෙනවා

සියලු දේ අනියත බව
බුදුන් දෙසූ දහමෙ තිබුණා
රතන සුත්ත දෙසුමෙන්
එදා තුන් බිය මැකුණා

පරිසරයට වින කරන විට
දහස් ගණන් සතුන් මරණ විට
වැඩිහිටියන්ට නොසලකන කොට
බිහිසුණු රෝග ඇති නොවේවි ද මිනිසුන් හට

අමරා කුරුප්පුමුල්ලගේ
උඩගහමුල්ල

වහලට ටකරන් ය, මැටි ගේ අන් අයට
ඉන වට සරල පිළි, දුටු දා සිට ඇඟට
කිව්වට මොකද පුටු දෙක තුනමයි ගෙයට
හැමවිට සිනා හඬ එනමුත් ගෙන් පිටට

එහෙමට නැතත් තැනකදි උතුරන සතුට
සරුවට ඇතත් නොසතුට ඇයි තව අයට
දහමට යටත් මෙය පව පින මුත් අපට
සසරට බැඳෙන විමසිය යුතු දේ සැරට

අධ්‍යාපනවේදී,
විශ්‍රාමලත් පරිවේණාචාර්ය,
පී.බී. ගුණරත්න