කඨින පින්කම් රාජ්‍ය මහෝත්සවය සෝමවති පුදබිමේ දී
 මෙරට බෞද්ධ ජනතාව විසින් වසරකට වරක් සියලු විහාරස්ථානයන්හි පවත්වන ප්‍රධාන බෞද්ධ
උත්සවයක් ලෙස සැලකෙන කඨින පින්කම් මංගල්‍යයේ තවත් විශේෂ පිටුවක් පෙරළමින් රාජ්‍ය
කඨින පුණ්‍ය මහෝත්සවය සහ පඬු පෙවීමේ මහා මංගල්‍යය ජනාධිපති ගෝඨාභය රාජපක්ෂ
මැතිතුමාගේ ප්‍රධානත්වයෙන් පසුගිය 8 වැනිදා ඉරිදා පෙරවරුවේ පොළොන්නරුව ඓතිහාසික
සෝමවති පුදබිමේ දී පැවැත්විණි.
දෙවැනි පරාක්‍රමබාහු රජ සමයෙන් පසු රාජ්‍ය අනුග්‍රහයෙන් කඨින මහෝත්සවයක් පැවැත්වුණු
ප්‍රථම අවස්ථාව මෙය ලෙස සැලකේ. පෙර රජ දවස පැවැති චාරිත්‍රයක් වූයේ කපු වගා කර,
නූල් කටිමින්, එම නූලෙන් වියූ කපු රෙදි භාවිත කරමින් කඨින චීවරය මසා, පඬු පොවා
සාංඝික කිරීමයි.
රජ දවසේ බෞද්ධ පුනරුදය සිහිගැන්වූ මෙවර රාජ්‍ය කඨින පින්කම් මහෝත්සවය අග්‍රාමාත්‍ය
මහින්ද රාජපක්ෂ මැතිතුමාගේ අනුකූලතාව ඇතිව සංවිධානය විය.
කඨින චීවර පූජා මහෝත්සවයට පැමිණි ජනාධිපතිතුමන් සෝමවති රජමහා විහාරාධිපති පූජ්‍ය
පහමුණේ ශ්‍රී සුමංගල හිමියන් බැහැ දැක ආශිර්වාද ලබා ගත්තේ ය. බුද්ධ පූජා පෙරහරට සහ
පූජාව පිළිගැන්වීමේ ආගමික වතාවත් සඳහා ද සහභාගි වූ ජනාධිපතිතුමා කඨින චීවරය පඬු
පෙවීමේ මංගල්‍යයට ද එක් විය.
දවල් දානමය පුණ්‍ය කර්මයෙන් අනතුරුව පඬු පෙවූ කඨින චීවරය රාජ්‍ය අමාත්‍ය දයාසිරි
ජයසේකර මහතා විසින් පෙරහරින් වැඩම කරවන ලදී. ජනාධිපතිතුමන් විසින් එය සඟ සතු කොට
පූජා කරන ලදී.
මල්වතු පාර්ශ්වයේ අනුනායක පූජ්‍ය දිඹුල්කුඹුරේ විමලධම්ම අනු නා හිමියෝ
පුණ්‍යෝත්සවයේ ප්‍රධාන අනුශාසනාව කළහ. හිටපු ජනාධිපති මෛත්‍රීපාල සිරිසේන මැතිතුමා,
සිරිපාල ගම්ලත්, රොෂාන් රණසිංහ යන රාජ්‍ය අමාත්‍යවරු ඇතුළු පිරිසක් ද මේ අවස්ථාවට
එක්ව සිටියහ. සෞඛ්‍යාරක්ෂිත ව රාජ්‍ය උත්සවය පැවැත්වීමට සිදුවීම නිසා පින්කමට
අත්‍යවශ්‍යම පිරිස් පමණක් සහභාගි කර ගන්නා ලදී. |
