සැමට පිදේ බුහුමන්

දිවමන් බුදුහිමි අබිසෙස් ගැන් වූ
සසුන දිලෙන මේ පහන් බිමයි
සිවු මුනි පහසින් වැලිකැට මිණිකැට
ලෙස තෙද ගැන්වෙන සුපින්බිමයි

පෙර රජ දරුවන් සම්බුදු සසුනට
පුද දී රැකගත් විජය බිමයි
ලංකා මව්බිම සුරැකෙන හැම විට
පළමුව තෙරුවන් සරණ ලබයි

අහසින් පොළොවෙන් ජලයෙන් මව්බිම
සුරකින තෙදබල විරුවන්ගේ
සේවය අදටත් අප වෙනුවෙන්මයි
නොබලති සිය ජීවිතයෙ අගේ

රෝ බිය රකුසා ගිලගත් මව්බිම
වෙත ජීවය දී ඉදිරි යුගේ
සුවපත් දැයකට රට ඔසවන ඒ
රණවිරු දෑතම මගේ මගේ

මරණයෙ අබිමුව සිටිනා ගිලනුන්
බේරා ගැනුමට කුලුණු සිතින්
සිය දිවි දෙවැනි ව ඉදිරියට ම යන
සුව විරුවන් සමරමු අදරින්

තෙරුවන් විරුවන් නැතිදා මව්බිම
හෙළනා පණ අවසන්
පණ දී පුද දී මේ බිම රකිනා
සැමට පිදේ බුහුමන්

කොළඹ බෞද්ධාලෝක මාවත
නාරද බෞද්ධ ධර්මායතනාධිපති
ශාස්ත්‍රපති රාජකීය පණ්ඩිත
තලල්ලේ චන්දකිත්ති හිමි