මෙවර ජයග්‍රාහී කවිය

බුදු මඟ

මෙත් කරුණාව හා මුදිතා නම් ගුණය
මැදහත් බව සමඟ සිව් බඹ විහරණය
වඩවනු නිතින් දුරු වෙයි සිත අසහනය
බුදු මඟ එය යි රැස්වන පින අපමණය

ඩබ්ලිව්. වී. ඩී. කරුණාරත්න
මාවතගොඩ,හොරවල

මිනිස් සිත

සාමය සදාචාරය මෙහි ඇති වේවා
සෙලවෙන සිතට බල පෑමක් නොම වේවා
ලක්වැසි සැවොම රට රැකුමට එක් වේවා
තම සිත ඉන්ද්‍රඛීලය මෙන් පව තීවා

එස්. හේමනායක
උඩතුත්තිරිපිටිය

පියුම

සිරිපා පියුම අබියස පුද දෙන පියුම
සුවඳින් සුවඳවත් වී ඇති බව දැනුම
පැහැය ද මනස තුළ දී පැහැ සම වීම
සැමවිට තබා ගමු සිත පැහැ ලෙස පියුම

කිතුල්ගල රත්නසේකර රූපසිංහ

සිත

සඳ වියන යට හිඳ
සිසිල් නා අරනේ
ගල්තලාවේ
එකඟ වූ සිත
බැහැරලයි
එකිනෙක
කෙලෙස් මළ
සසරේ නිමේෂය
සොයා යන්නට
වෙහෙසෙයි
ප්‍රභාස්වර වූ සිත
නිසල කයට ද නොකියා

මාස්පොත ධම්මජෝති හිමි
මීරිගම

අනිත්‍ය

ගොරෝසු මුහුණ
කිළිටි වූ නුඹෙ දෙපා
පිළිවෙළක් නැති වත
අපට කියා දුන් පාඩම්
ජීවිතයට අනිත්‍ය
කියා දෙද්දී
කඳුළු වැටුණා
මහ වරුසාවක් මෙන්

සමන්ත මහතන්තිල
රත්නපුර

පැවිද්ද

සැම දෙයක් ම අස්ථිර බව තේරුම් ගත් මම
මිට මොලවන් සිටි සැමදේ අත හැරියා මම
මගේ කියා කිසිවක් නැත තේරුම් ගත් මම
බුදු සසුනේ පැහැදි සිතින් පැවිදි වුණා මම

නාභුඩුවේ විමල විසුද්ධි හිමි
දොඩම්ගස්ලන්ද

මෙතේ බුදුන්

පිපී පරව යන නොයෙක් වූ වන මල් ඉති පොකුරු වනේ
අනියත දුක යන අනත තිලක්ෂණ ලෝ තල විහිද වුණේ
එකල බුදුන් දැක නිවන් මගේ ඵල ලැබ ගන්නේ
සසර ගමනෙ දී මෙතේ බුදුන් දැක්මට වාසනා ගෙනේ

එම්. ජී දේවින්ද කුමාර
මීරිගම

නිවන වෙත

මනුසත් භවයක් ලැබුමත් දුලබ ම දෙයකි
බෞද්ධයකු වීම ම පෙර පින් කමකී
නොගතොත් නිසි ඵලය තම දෝතින් ම මෙකී
තරණය නොහැක සමුදුර සංසාර සකී

සිව් අසූ දහසකුත් දම් කඳ දෙසුව එදා
තුන් ලොවටම යන්න තිරසර පහුර හදා
දුන් ඒ සමිඳු නිති හද බැතින් පුදා
එතෙරට පදිමු රුපු දුක් ජල කඳෙන් සදා

ජී. නිලූෂා දිල්රුක්ෂි
මැදගලතුර
රත්නපුර

තෙරුවන් නමදිමි

බුදු දම් සඟ යන තෙරුවන් නමදිමි
තෙරුවන් ගුණයට දාසව මම වෙමි
බුදු හිමි ගුණයන් හද තුළ රඳවමි
මාගේ සිරසෙහි තෙරුවන් පිහිටමි

තිසරණ ගුණයන් හද තුළ රඳවමි
තිලකුණු හද තුළ බැතියෙන් නමදිමි
නිවන් සුවය මම නිතරම සමරමි
මතු මත්තේ මම නිවනින් සැනසෙමි

පොල්ගහවෙල , ඉහළ උඩපොල
ජී.ආර්.සීලවංශ බණ්ඩාර

අද දවස

ගම්මානේ අඳුරක් වී සිටි දවස
අඳුර මකා ගම්මානෙට ආ දවස
මිනිස් සමූහය සිල්වත් වූ දවස
බුදුන් දැකීමට නම් අද වී දවස

මාහරගම හේමරතන හිමි
ශ්‍රී පඤ්ඤානන්ද පිරිවෙන, මාහරගම, ගිරිඋල්ල.

සසුනඹර සඳ

හිස මුඩුකර ගත සළු පිළි පොරවා
සන්සුන් ගමනින් පා නඟනා
මා කුස හොත් පුත
අද නුඹ ඈතයි
අහස පොළොව සේ දුරස් වෙලා
සිතට දැනුන දුක ඉහළ ගොසින් අද
සක්විති රජකම උරුම වෙලා
නෙතගේ කඳුළැලි දෝරෙ ගලා යයි
සසුනඹරේ සඳ එළිය වෙලා

එන්. ජී. කුමාරි
රත්නපුර

සම්බුදු සසුන

සම්බුදු ගුණ නිති සිහි වේවා
සම්බුදු දහමින් හද සැන සේවා
සංඝ භේද හැර සසුන රකීවා
සසුනේ දූ පුත් සම ව වැඩේවා

හෝකන්දර සුදිත්තා මෙහෙණින් වහන්සේ

වට්ටාරමරාජ මහා විහාරය

ගෝඨාභය රජුන් දවස
ඉතිහාසයෙ ලියැවෙන්නේ
වටේම ආරාම නිසා
වට්ටාරම නම වන්නේ
මලියදේව මහ රහතුන්
වැඩ සිටි පුද බිමකි එදා
වට්ටාරම විහාරයේ
වැලි කැට පෑගුණත් හොඳා

දේවාලේගම රුවන්ති මුරුතවල

ඇසේවා සදහම්

දොවා දොවා කරුණා සිසිලෙන්
නිවා නිවා දැවෙනා කෙලෙසුන්
දෙවා දෙවා නිතිනා සැනසුම්
ඇසේ අසේවා ශ්‍රී සදහම්

හරසුන්, සසරින් එතෙර දකින්නට
විදසුන් නුවණින් බවුන් වඩන්නට
සුපසන් සමාධි සුව විඳ ගන්නට
ඇසේ අසේවා ශ්‍රී සදහම්

ගීතා චාන්දනී ජයරත්න
කොස්වත්ත