අම්මා
වලිගෙන් මහ මුහුද ඉසින්නට වෙහෙසුණු අම්මා
ගිලිහුණු පණ පුතු ලැමදට තුරුලු කරන් අම්මා
යළි ජීවත් කරවන්නට ඖෂධ සෙව් අම්මා
සුළි නංවා දරු සෙනෙහස දෝරෙ ගියා අම්මා
කුසට මෙමා ආ දින සිට සෙනෙහස පෑ අම්මා
රසට පිසූ විස අහරක් දිව නොතැබූ අම්මා
මරුට පුදා තම ජීවිතෙ මා බිහිකළ අම්මා
නුඹට ණයයි මා සසරේ සරන තුරා අම්මා
කහට කෝප්පය ද නිවා බීමට ගත් අම්මා
ගතට වෙහෙස දී කඩිසර ගමන් නොගිය අම්මා
පිහිට කරන් තෙරුවන් ගුණ මට සෙත් පැතූ අම්මා
නුඹට අමා සග මොක් සුව මතු උරුමයි අම්මා
රුවට තිබුණු ගත සවිබල පිරිහෙන විට අම්මා
දුවට පුතුට බරක් වුණා රන්කිරි පෙව් අම්මා
ලොවට නො පා ඒ දුක ලැමදේ හිරකළ අම්මා
දැයට කිරුළ මිහිබට දෙව්දුව ඔබ මගෙ අම්මා
රතු ලේ බිඳු කිරට පෙරා මා දැඩිකළ අම්මා
සිතු සම්පත් කැටිකොට දෙන්නට නැතිමුත් අම්මා
පුතු සරු දහමින් පොහොසත් කොට හැදුවා අම්මා
පැතූ බෝධියකට පැමිණ නිවන් දකින් අම්මා
ගොකරැල්ලේ ජිනවංශ හිමි
නිසලවිල භාවනා මධ්‍යස්ථානය
තුඹුල්ල, නබඩෑව |
