අනියත දහම

සෙනෙහස ආදරය කරුණා දයා හද
ගුණ පිරි ඔබේ ඔවදන්වල ගැබ්ව ඇත
යන්නට සසර තව තව දුක් ගැහැට මැද
ඕන ද කියා අසනවා නිරතුරුව හිත

දින සති මාස අවුරුදු ගත වී යනවා
මේ ගත සිත ද තව තව වැහැරී යනවා
සියලු දහම් අනියත බව වැටහෙනවා
සම්බුදු පියා දෙසූ සදහම් සිහි වෙනවා

කෙලෙස් නිසයි මේ දුක මට හටගන්නේ
කෙලෙස් නිසයි සසරේ අප ඇවිදින්නේ
කෙලෙස් නිවන ලෙස දම් දෙසලා ඇත්තේ
කෙලෙස් නිවන ඒ මග මම යා යුත්තේ

සම්බුදු කුටිය තුළ දැල්වෙන බුදු පහනේ
එළියෙන් මුනිදු දෙසූ දම් මට වැටහෙන්නේ
හේතු නොමැති විට නිවිලා යන විලසේ
මටත් නිවෙන්නට හැකිනම් මේ සසරේ

සොබා දහම තුළ සිටිනා විට සිතට
දැනෙනා සුවය කෙතරම් දැයි කිව නොහැක
ඒ තුළ ඇත්තෙ කෙලෙස් ම බව දැනෙන විට
හිමියනි දෙසනු මැන කළ යුතු දෙය කිම ද

-  එන්. ශ්‍යාමලී අතුකෝරල
ගාල්ල