උතුම් පොහෝ දින

කසුප් සමිඳු මුල් වී බුදු බණ සැකසූ
පළමු දහම් සංගීතිය සිදු කෙරුණු
අබිදම් විනය සුතුරය තුන් පිටක මතූ
පරපුර වෙතට නිති නිසි ලෙස දුන් මහරූ
උතුම් පොහොය දිනය යි නිකිණිය සොඳුරූ
අනඳ සමිඳු ලැබ අරහත් බව ඔකඳින්
උතුම් රහත් සමිඳුන් හා එකතු වෙමින්
පළමු වරට දම් සංගීතිය කරමින්
දහම් විනය රැකගත් යුරු සිහි කරමින්
අදත් නිකිණි සඳ ඇත අහසේ දිළෙමින්
පින්බිම සේරුවිල වෙත දන රැස් වෙන්නේ
ලලාට දා වැඳ පින් රැස්කර ගන්නේ
පසුවස් එළඹුමත් නිකිණියෙ සිදු වෙන්නේ
නිකිණි පොහොය එලෙසිනි වැදගත් වෙන්නේ

මාලබේ
කේ. ඩබ්ලිව්. සිරිසේන

****

මනුස්සකම

දහමින් විනා අදමින් වැඩ නොකළ යුතු
අන් සතු දෙය එපා ඇති දෙය තමා සතු
නො සොයා කිසිම දිනයක අන් අයගෙ තතු
රට දැය නඟා පෙරට ම යා යුතු ය මතු

බාධක කම්කටොළු නිති පසුකර ලන්න
නැණ ගුණයෙන් ඔබ දිවිමග බබළන්න
නින්දා ප්‍රශංසා සමසේ පිළි ගන්න
අටලෝ දහම අනුව ම ජීවත් වන්න

ගලේවෙල
එච්. එච්. ආනන්ද සමරසිරි

සංස්කරණය
ජම්මික ප්‍රබෝධනී වැලිකල

****

කවි කිවිඳියනට සතර පෝ දාටම දහම් තුටු පඬුරු

බුදුසරණ ‘පහන් සිතක කවි’ නිර්මාණ පිටුව සරසන ලේඛකයන් ඇගයීම පිණිස ඉල් පුර පසළොස්වක පෝදා සිට දෙහිවල නැදිමාල බෞද්ධ සංස්කෘතික මධ්‍යස්ථානය සහ කොළඹ සම්බුද්ධත්ව ජයන්ති මන්දිරයේ අධ්‍යක්ෂ කිරම විමලජෝති නා හිමියන්ගේ අනුග්‍රහයෙන් දහම් පඬුරු තිළිණ කෙරේ. සතර පෝදාට ම හොඳම නිර්මාණ එවන ජයග්‍රාහකයන් සතර දෙනෙකුට එම තිළිණ පිරිනැමෙනු ඇත.