නික්මයාම

බෝපතක මදහස
මිහිමතේ වැතිරිලා
වසන්තය ඇවිදින්
නමුත් නුඹ
දෙනුවන් පියා
පසළොස්වක අහසේ
සඳක් වී නුඹ සිටි නිසා
මොහොතකින් සැඟවී ගියාදෝ
සඳ එළිය අඳුරක තියා
ඈත දුරකට ගොසින් නුඹ ඇත
ලොවේ සැනසිලි බව සොයා
සුමුදු බෝපත් සැලෙන තාලෙන්
ජීවිතේ අරුමය කියා

සමන්ත මහතන්තිල
රත්නපුර

සම්බුදු පියා නමදිමු

සිව් සස් පසක් කළ වැඩු පාරමී බෙලෙනී
ලොව ඇති සියලු තතු මැනවින් දත් සොඳිනී
සව් සත වෙතට පැතිරූ මෙත සම සිතිනී
සම්බුදු පියා නමිදිමි හද පිරි තුටිනී

ශාන්ත කුරුප්පුමුල්ලගේ
උඩහමුල්ල
නුගේගොඩ

නොමිනිසුන් නොවෙමු

ඉපදුණෙ ලොවට එක බඩවැල කඩා ගෙන
ලිප මත පිසුණු බත කෑවේ බෙදා ගෙන
සැප සම්පතට සිත දෙයි ලොල වැඩී ගෙන
ගෙපැළට සටන් වැද හිමිකම් කියා ගෙන

දෙගුරුන් සිඟයි මහ මඟ ටින් එක ගත්තු
නිලතල දරයි ලොව ඉහළින් දූ පුත්තු
උපන් ගෙබිම බලයෙන් ලියවා ගත්තු
උන්මය නොවෙද මිහිපිට තිරිසන් සත්තු

ඩී. ජී පාරමී සඳලිකා
ශ්‍රී බෝධිරාජ දහම් පාසල
රජ මාවත, කතරගම

සුදු ඇන්දත්

කොකෙක් වගේ සැරසුණාට
පන්සල් තුළ ගැවසුණාට
ගුණ දහමින් නොපිරුණහොත්
කලුම කලුයි ඔබේ පාට

නොම කර ලෝකෙට රැවටිලි
පුරවා ගෙන පින් සිතිවිලි
හිඳිනා ඔබ සුදෝ සුදුයි
ඇන්දත් දැළි කුණු වැරැහැලි

චන්ද්‍ර වාකිස්ට

වස්සානය

සැරසී සුදු වතින් තෙල් මල් ගෙන දෝතින්
එක්වී එක මඟට පන්සල් පැමිණ තුටින්
නික්මී යන දවස පිළිබඳ සිතා නැණින්
සිත් සේ කුසල් කර ගන්නට සිතමු ඉතින්

වස්සානයයි මේ එළඹී තියෙන්නේ
පින්සාරය යි හද තුළ ලියලා එන්නේ
සම්මාදමයි සමඟි ව කළ යුතු වන්නේ
අට මහ කුසල ට ඉඩකඩ සැලැසෙන්නේ

අමුණුගොඩ කුසමා
ප්‍රේමරත්න
කුරුණෑගල

අදයි අමාවක පෝ දා

ලෝ සතුන්ගේ සිත් බලා
හිමි දෙසූ සදහම් මල් පිපී
මෙත් සිතින්ම යි හිමි වඩින්නේ
සිරිපතුල් මිහිකත සිපී

අත් මුදුන් දී වඳිමු මුනිඳුන්
පතාගෙන නිවනම අපී
වප් මහේ අද අමාවක දා
සිල් සමාදන් වෙමු අපී

ජයසිරි චන්ද්‍රලතා හපුආරච්චි
බෙල්ලන්දොල පාර
මණ්ඩාවල

නිදුකාණෙනි

භව දුක භවඳුර නිවෙනා
ආලෝකයේ හිරු දිලෙනා
සාල වනේ මල් පිපෙනා
කුමරෙක් මනු ලොව වඩිනා

මොහඳුර දුක කිම සොයනා
සිරුරට දුක් ගිනි දෙවනා
මැද මාවත පිය තබනා
ලොව්තුරු බුදු බව ලබනා

සුවහස් දන තෙර යවනා
කරුණා දිය බිඳු ඉසිනා
නිවනට මඟ හෙළි කරනා
දම් මිණි කඳ පිරි නිවෙනා

අනුර ජයවීර
බදුල්ල

නමදිමු තෙරුවන්

කල්ප දස දහස් පෙරුමන් පුරාලා
සක්විති රජ සැපත පසෙකින් තබාලා
අප හැම කෙරෙහි මුදු කරුණා පතුරලා
බුදු හිමි අපට දුන්නා අම දම් බෙදලා

පළමුව වඳිමි මගෙ සම්බුදු පියා ගරු
දෙවනුව වඳිමි ඒ සදහම් ඉතා ගරු
තෙවනුව වඳිමි සඟ ගණ ලොව පුරා ගරු
වඳිනෙමු තුනුරුවන් මේ කප පවතිනා තුරු

ලයනල් දසනායක
නාමල් උයන, නියඳගල, පන්නිපිටිය

සත්තු වත්ත

උඩ යට
දස දෙසේ
හැම තැනම
මනුසත්තු සමඟින්
නෙක සත්තු කවලමේ

කේ. ඩබ්ලිව් . සිරිසේන
මාලබේ

අවබෝධය

අඳුරේ දිලුන ආලෝකය පහව ගියා
පහනේ තිරය ඉතිරි ව තෙල් සිඳී ගියා
රුදු සුළඟකට පවා දැල්වුණු පහනකිය ඔයා
සිතුවෙමි මෙමා සැම දේ අස්ථිරය කියා

සසරින් සසර පැතු විලසින් හමුවීම
දුක් වේදනා සමුදායකි වෙන්වීම
ඉපදී මැරි මැරී යළි යළි ඉපදීම
බිඳ සැනසෙමු ද ඝොර වූ සසරෙහි බැම්ම

සීතා කුමාර පල්ලියගුරු
අම්පිටිය
මහනුවර

වැටහීම

තිස් වසක්
එක වහලයක යට හිටියත්
මගේ සිතම මිස
සොඳුර
අසුරු සැණක්වත්
මා නුඹ
ඇසුරු කර නෑ
යථාර්ථය
වැටහුණා මට
වැටහුණා

පරගම්මන – නන්ද
පරගම්මන, යක්විල

සත්තු වත්ත

උඩ යට
දස දෙසේ
හැම තැනම
මනුසත්තු සමඟින්
නෙක සත්තු කවලමේ

කේ. ඩබ්ලිව් . සිරිසේන
මාලබේ

අසම සම ගුණය

නෑවූ තිලොව මහ කරුණා ගුණය පෙරා
පෑවූ සුපුන් සඳ පරදා කිරණ දරා
සිවු ගුණය සිත සිතී මගෙ බැතිය පෙරා
පේවූ සිතින් නමදිමි මුනිදු ලොව් තුරා

ගමේ උපාසක

පිය ගුණ

ඔබ අගය පවසන්න මට වදන් තවම මදී
ඔබ ගුණය පතුරන්න මිහිතලය ඉඩ මදී
ඔබ ගයපු ගීතිකා මගෙ හදේ තව රැඳෝ
මතු දිනක උපදින්න පියාණන් වී මගේ

ශීලා ජයකොඩිසිරිමාපුර,
තඹුත්තේගම

මර බැඳුම

මම වෙමිය සිතු
බැඳෙයි දුක්ඛිත සසරට
නොවෙමි මම සිතූ විට
මිදෙයි සසරින් එත කොට
සිතිවිල්ලකින් මයි
බැදුණේ සසර බැඳුණේ
සිතිවිල්ලකින් මයි
මිදුණේ සසර මිදුණේ
අසා සම්බුදු බණ
නසා තණ්හා දිට්ඨි මානය
අමා මහ නිවනට
වහා පිවිසෙමු වසා මරු ඇස

ආරණ්‍යවාසී හිමි නමක් විසිනි

මව් පිය වරුණ

අය වෙත, උරුම සොයනා යුග දිවි බැඳෙන
කියනුව කැමැති බුදු වදනක් සිහි මැවෙන
සිය වසරක් ම පිදුවත් උරමත රැගෙන
එය මුත් ඉවර නැත, මාපිය වරු පිදෙන

පී. බී . ගුණරත්න
සුමනතිස්ස පිරිවෙන
දෙහිවල

සංස්කරණය
ජම්මික ප්‍රබෝධනී වැලිකල