අනුබුදු හිමි ධාතු

අනුබුදු හිමිගෙ ගත ධාතුන් නිදන් කෙරූ
සුදුමුදු සෑ රදුන් දිලෙනව අතර තුරූ
හිරු සඳු පවතිනා තෙක් සැදි ලෙනින් පිරූ
මනබඳු අරණ සැදැහැති සිත් වසඟ කෙරූ

හිමි සඳ මිහිඳු අහසින් වැඩි බව කියන
ලෙන මැද පියසෙ සෙල් ලිපියකි තතු ලියන
සමිඳුනි රටට පිහිටක් වන ලෙසින
රොද මැද වැඩිය අපි වෙමු බුදු හිමි සඟන

දන්තුරේ ජයසේකර
මහනුවර.

ගල්වඩුවාණෙනි

අව්කන අනුරපුර සමඟම පොළොන් නරූ
සිව්කොන හෙළ දෙරණ තුළ කළු ගලින් කෙරූ
නිවි සිත සමාධිය මත හිමි සිටින තුරූ
ලොව්තුරු මුනි ගුණය උතුරා ගලයි සරූ

කටු මිටි අත දරා කර ගැට නැඟෙන තුරා
ඉටු කළ මෙහෙය පුදුමයි එඩිතරයි නුරා
තුටු කර සව් සතුන් සිත් යයි නිවන කරා
ඉටු කර තිබේ යුතුකම ඔබ සැමට හොරා

විමලසේන හෙට්ටිආරච්චි
අස්ගිරි, වල්පොල.

පන්සල් යමු

සුපිරි ගෙයක් තුළ සුවසේ සිටියත්
සිතේ කෙලෙස් අඩු වෙන්නෙ නැතී
සියලු දේ ම ඇති හැටියට දකින්න
මේ සිත හැදෙන්නෙ නැති ම හැටී

බුදුවරයෙක් ලොව පහළ වෙන්නේ නම්
සසර දුකෙන් මුදවන්න අපි
පන්සල තෙරුවන වැඩ හිඳිනා තැන
පෝයටවත් පන්සලට යමු

අමුණුගොඩ කුසුමා ප්‍රේමරත්න
කුරුණෑගල.