උතුම් ධර්ම දානය

ලොව උතුම් ධර්ම දානය අගතැන්ගන් නේ
ධර්මය පිළිබඳව එවිටයි වැටහෙන් නේ
තිසරණ සරණ ලැබුවොත්නම් සැනසෙන් නේ
ධර්මය දෙන අය දෙලොවම ජය ගන් නේ

අවිහිංසා හඬ හැම තැන ඇති වේවා
වෛරය මාන්නය දින දින අඩු වේවා
ධර්ම දාන දෙන අය තව වැඩි වේවා
බුදුසරණ ලැබ දුක් කරදර නැති වේවා

වැලිකන්නගේ සිරිපාල
කීරන්තිඩිය
මතුගම

****

පන්සිල් රකිමු

පන්සල බෝ මළුව වෙත පැමිණ බැති සිතින්
සන්සුන් සිත් ඇතිව සැරැසිලා සුදු වතින්
දන් සිල් භාවනාවල යෙදී හද වතින්
පින්බර දිවිය සරසමු වතින් පිළි වෙතින්

අන් දිවි නොගලවමු සව් සතට මෙත් සිතින්
දුන් දේ මිසක් නොගනිමු යමක් සොර සිතින්
වෙන් වෙමු වැරැදි පහසින් මුසාවෙන් මතින්
පන්සිල් රකිමු සපිරෙමු වතින් පිළි වෙතින්

ගොකරැල්ලේ ජිනවංශ හිමි

****

දහම් පද

රාගය ගිනි හුලකි සත සිත දවාලන
මෝහය මිරිඟුවකි එහි ඇත්තක් ද නැත
දොසෙන් බැඳි සිතක කරුණා ගුණය නැත
මෙය දුරු කළොත් ඒ සිත මත නිවන ඇත

විමලසේන හෙට්ටිආරච්චි
අස්ගිරිවල්පොල