මගේ පැතුම

තිලොවට තිලක මගෙ සම්බුදු පියාණෙනි
සිරිපා කමල්මත මහනෙල් මලක් වෙමි
ජීවිතයම පුදා සදහම් පිළිපදිමි
මහණදම මගේ බුදු සමිඳුගෙ නමිනි

මිස දිටු අසත්දන ඇසුරක් නොම වේවා
ගුණදම් රකින පින්බර දන හමු වේවා
සසරේ කරන ලද අකුසල් දුරු වේවා
නිරතුරු පාරමී දම්ගුණ සපිරේවා

පොල්ගස්ඕවිට ධම්ම වීමංසා සිල් මාතාව
ශ්‍රී බෝධිරුක්ඛාරාමය
හසලක

****

නව දොරක් විය

ලෝකය දුටිමි එය බඹයක් පමණ විය
රාගය ද්වේශ මෝහය දුරු කර හැරිය
දෙතිසක කුණප පුරවා නව දොරක් විය
මිනිසත් බව ලැබගත් හැම මෙහෙම විය

වා පිත් සෙම් දොසින් නිතරම ලෙඩ දමන
න ෑ සැනසුමක් දිව රැහැම නිදි වරණ
ඒකත් මරණයකි මැරි මැරි උපදවන
මේකයි දහම හිමි සමිඳුන් කියාදෙන

සෝමාවතී දිසානායක
රනිස්වල කළගෙඩිහේන

****

බවුන් සිත

බවුන් සිත වඩන්නේ
ගුණ දහම් සිතන්නේ
රහත් මඟ දකින්නේ
ඒ උතුම් මඟ වඩින්නේ
කෝට්ටපිටියේ පඤ්ඤාසිරි හිමි

සාලිය – අශෝකපුර

****

දහමින් බිඳක්

නිවන, නිවන කියනා මෙම අම නිවන
දවන සිත සිසිල් කර පවනැල් සැලෙන
දුවන සිත සමාධිය වෙත හුරු කරන
නිවන නිවන මයි දැක ගත හැක හෙවණ

****

පරපණ නොනසමු

බර කර ගසා පවුලක කුස පුරවන්න
උර හිස රිදෙන තුරු මහ බර උසුලන්න
ජරමර ඉවසමින් හැම බර ඇද දුන්න
ගෙරි මස් නොකනු මැන අපරාදේ ඔන්න

පරපණ නසා මස් අනුභව කරන්නෙපා
බෙර පද ගසා නරි නාටක නටන්නෙපා
දිරවන්නට බැරිව ලෙඩ දා ගන්න එපා
නිරයට යන්න වෙයි ගෙරි මස් කන්න එපා

පුරන් හෙට්ටිහේවා
විල්ගම්වෙහෙර

****

අමාවතුර

අමාවතුර
ගලා හැලේ
ගස්වල මල්
පිපී නටයි
බුදු රුව ළඟ
මගෙ හදවත
සුවය සොයයි

සමන්ත මහතන්තිල
රත්නපුර

****

දුම්වැටියයි මත්වතුරයි

මත් රකුසා පලවා හැර
දූ දරුවන් රැකගෙන
අත් වැල් බැඳ උදම් අනමු
අබිමානෙන් හැම දෙන

දෙදියවල
අමරදාස පෙරේරා