කවි සිතුවිලි

කෙලෙස්

තණ්හා ආශා මෙවලම් පොදි බැඳ
ක්ලේශ මරඟනන් සමඟින්
කෙළවර නො දකින ජීවිත ගමනේ
උපදින අප සැම ගමන් කරනවා
පංචස්ඛන්ධය සතපාලන්නට
සැප සම්පත්වල මධු රස හින්දා
ජීවිත ගමනත් දික්වෙනවා
රන්මසු සම්පත් වස්තුව හින්දා
කෙලෙසුන් දහනය කළ නො හැක
ජීවිත ගමනේ කෙළවර දැක්මට
කෙලෙස් දහනෙන් මිදිය යුතු යි
අමරා කුරුප්පුමුල්ලගේ

උඩහමුල්ල

උඳුවප් පොහෝ අසිරිය

පන්දහසක් වර්ෂ රැකගනු ලෙස බලය
පින් ඇති රටක් පැළ කොට සදහම් පැළය
රොන් පිරි මලක් මෙන් තෙරුවන් ගුණ බලය
තුන් වාරයක් වැඩිය බුදු හිමි තුන් හෙලය

අනුබුදු මිහිඳු හිමි වැඩියා අනුර පුර
මනුසත් ගුණෙන් හඬවා බුදු දහම් බෙර
දෙනුවට බෝ සමිඳු ගෙනවිත් රහත් තෙර
අනුලා මෙහෙණකම ලැබුවා සසුන් තෙර

බුදු සිරිපද තබා සමනොළ කඳු මුදුන
සිදු කළ සේක පින්කෙත සැමටම බොදුන
බොදුවන් පා ගමන කරුණාවෙන් බැඳුන
උඳුවප් මහේ සිසිලස අසිරිය රැඳුන

කැස්බෑවේ මුණසිංහ නිශ්ශංක

නිවනට මඟ

සරා සිතැඟි මින් වැළ මෙන් වැඩෙන
මරා නො මැති විට නතුවෙයි සිත නිතින
කරා නො හැකි වෙයි යාමට පැතු නිවන
මරා සිතැඟි නවතමු යන බව ගමන

මාලබේ එම් . ගුණවර්ධන

සව් සඟන රැක

නුවණැත්තෝ ය සඟ ගණ තිරසර නැණැතී
කුසලැත්තෝ ය සුදැහැමි සුරවර පිනැතී
දැනුමැත්තෝ ය සිරි සදහම් ගුණ දැනැතී
ගුණ ඇත්තෝ ය නිකෙලෙස් පිරි නැණ ගුණැතී

සිව් බුදු පහස ලද සිව් බුදු ගුණෙනි නෙක
සිව් මඟ පල අනුව බව දුක හරින සැක
සිව් වණ පිරිස සමඟින සෙව් සසුන දැක
ලෙව් විදු සසුන රැකෙනුව සව් සඟන රැක

බුද්ධිනී චතුරිකා වැලිකල
කැලණිමුල්ල , අංගොඩ