රට දැය රකිමු

පින්වත පින්වතිය කවුරුත් එක්වීලා
රට දැය සසුන රකිනෙමු අපි දිරිදීලා
වැල්ලේ ඇන්ද ඉර මෙන් පව් අත ඇරලා
එකමුතුකම රකිමු සැමදෙන එකතු වෙලා

යුතුකම් පැහැර දරුවනි ඔබ ඉන්න එපා
සුවඳ නැතිකරල දුගඳ ය කියනු එපා
පේ‍්‍රත වේස ගෙන මළ කුණු කන්න එපා
සදහම පමණි වෙන කිසිවක් සිතනු එපා

වැස්සෙන් දෙයක් වේලන්නට සිතනු එපා
අව්වෙන් දෙයක් තෙත් කෙරුමට සිතනු එපා
බුදු බණ තුළින් ඔබ ඈතට යන්න එපා
සසරින් ගොඩයෑම වළකා ගන්න එපා

ධර්මාවබෝධයෙන් මා ලැබු කරුණු මත
කියවා හැදෙන්නට මේ කවි ලියල ඇත
මේ හැමදේ හොඳින් ඔලුවට ගන්න පුත
ඔබ හැම දෙනා හට ජයසෙත ලැබෙනු ඇත

හඳුගල විමලබුද්ධි
පොඩි හාමුදුරුවෝ
චිත්ත සමාධි ගුරුගේ අසපුව
උඩුපිල දකුණ දෙල්ගොඩ

****

නො පමාව

යා යුතු මඟ දුරයි සිතුවොත් දුරයි කියා
එසේ සිතන අය සැම විට වෙනවා පමා
අදට තිබෙන වැඩ කළ විට නො පිරි හෙලා
යාමට හැකි ය බුදු හිමි දෙසූ නිවන කරා

මාලබේ එම් . ගුණවර්ධන

****

සම්බුදු ගුණ සුවඳ

රන් පැහැ ගැනුණු දම්සක් බුදු පිළිමෙ දැක
සිත සැනසුණා හදවත මගෙ නොවී සැක
දම්පල් නිරිඳු නො සිටින්නට නම් මෙ රැක
ගන්නට සමත් වූවෙකු නැත කිසි ලොවක

දඹරුක් සෙවණෙදී පෙරුමන් පිරූ සඳ
දඹදිව් තලයෙ සිට සිප ආ බුදු සුවඳ
අඹ තලයෙන් විසුරුවා හැරියේ නිබඳ
එම පින් බලෙන් සැම වැජඹේවා සබඳ

කුමාරි රත්නායක
රූපහ