ශ්‍රී දළදා මාළිගාවේ රන් වියන ප්‍රතිසංස්කරණයෙන් පසු ජනපති දළදා
වහන්සේට පූජා කරයි
අසේල කුරුළුවංශ
ජනාධිපති අරමුදලේ රුපියල් ලක්ෂ 450 ක මුදල් යොදවා ප්‍රතිසංස්කරණය කරන ලද මහනුවර
ශ්‍රී දළදා මාළිගාවේ රන් වියන දළදා වහන්සේ වෙත පූජා කිරීම ජනාධිපති මෛත්‍රීපාල
සිරිසේන මහතා අතින් පසුගිය දා සිදු කෙරුණි. මෙම රන්වියන දළදා වහන්සේට පූජෝපහාරයක්
ලෙස හිටපු ජනාධිපති ආර්. ප්‍රේමදාස මහතා 1987 වසරේ දී පූජා කර තිබේ.
ගතවූ වසර තිහක කාලය තුළ රන් වියන 2002 වසරේ දී ප්‍රතිසංස්කරණය කර ඇත. එහි රන්පත්
දුර්වර්ණ වී ගැළවී යාමේ තත්ත්වයක් මතුවීම නිසා දියවඩන නිලමේ ප්‍රදීප් නිලංග දෑල
මහතා මෙයට මාස අටකට පමණ ඉහතදී එය ප්‍රතිසංස්කරණය කර දෙන ලෙස රජයෙන් ඉල්ලීමක් කර
තිබිණි.
මල්වතු අස්ගිරි උභය මහා විහාරයීය මහානායක ස්වාමීන්ද්‍රයන් වහන්සේ දෙනමගේ අවවාද හා
අනුශාසනා පරිදි රන් වියන ප්‍රතිසංස්කරණය කිරීමේ වැඩකටයුතු සිදු කෙරුණු අතර එය දළදා
වහන්සේට පූජා කිරීමේ අවස්ථාවට දියවඩන නිලමේ ප්‍රදීප් නිලංග දෑල, ඇමතිවරුන් වන
ලක්ෂ්මන් කිරිඇල්ල, ගාමිණී ජයවික්‍රම පෙරේරා, විජයදාස රාජපක්ෂ, මධ්‍යම පළාත්
ප්‍රධාන ඇමැති සරත් ඒකනායක, පළාත් සභා ඇමැතිවරුන් වන එදිරිවීර වීරවර්ධන, තිළිණ
බණ්ඩාර තෙන්නකෝන්, මහනුවර පුරපති කේසර සේනානායක යන මහත්වරු ද සහභාගි වූහ |
