අසිරිමත් පූජාව

සම්බුදු හිමි දෙසූ සදහම් අමා රස
අන් සැප කොහිද මේ ලොව දම් රසම මිස
කඨින චීවරයට යොමු කරල ඇස
බුදු හිමි නමදිමු අපි සැම නමා හිස

වැලිකලගේ සිරිපාල
කීරන්තිඩිය – මතුගම

අපිම අපිට නැතිනම් ...

දිවියෙන් තොරවී යහගුණ පිරුණු
පස් පව් දස අකුසල් කොට දරුණූ
මිත්‍යාවෙන් අන්ධව සිට මැරුණු
පිරිසට ඇත දුගතිය දොර ඇරුණු

පමා වුණොත් දිවියෙහි නෑ හරය
තමා වෙසෙන ගේ සමවෙයි නිරය
අපිම අපට නැතිනම් ආදරය
නිවන කියන අරමුණ බෝ දුරය

ලැබුවම අපලය පලදෙන යෝගේ
දුක ලුහු බැඳ එයි රියසක වාගේ
යහ ගුණ දම් තැකු දුහුවිලි වාගේ
අපේ මිසක් වරදද වෙන කාගේ

ගොකරැල්ලේ ජිනවංශ හිමි
අරියවංශ භාවනා මධ්‍යස්ථානය
මඩවලතැන්න
උහුමීය.

අවසරයි ...මට

පොඩි හාමුදුරුවො ඇමදූ මළුවේ
ඇවිද යන්න මට දුක සිතුණා
රටා මැකෙයි සිතලා...
ගෙනාව තෙල් මල් දෑත දරාගෙන
පඩිපෙළ කෙළවර නතර වුණෙමි මම
අවසර ගන්නට ඔබ පා වැඳලා..
අවසරයි මට...
පොඩිහාමුදුරුවනේ!

අමුණුගොඩ කුසුමා පේ‍්‍රමරත්න
කුරුණෑගල.

අමතක ද? සිල්

බුදුගුණ කියනා දහම් පොතින්
ගාථා කියනා මහා හඬින්
බෝ මැඩ වකුටුව දණ බිම ඇනලා
මෙත් වඩමින් සව් සත වෙනුයෙන්
පා තබමින් වැලි මළුව උඩින්
සෙමින් සෙමින් යයි නිවුණු සිතින්
ගත ගැටුණොත් හෙම අත් වැරදීලා
මුහුණ බලන්නේ රකුසු වෙසින්
පවාරණය වී වැඩූ සීලෙන්
නිවසට ගොඩ වී සැදැ සිතින්
හනිකට, ඇඳි සුදු සළු ගලවාලා
අඳුරේ ඕවිට දෙසට ගොහින්
පෙර සැදෑවෙ තිබු ගෙඩි අතරින්
වරකා ගහේ ගෙඩි අඩු දකිමින්
සීල වැඩූ බව අමතක කරලා
සකු භාෂාවෙන් වදන් දොඩන්
මහ රෑ දොළහට අවදි වෙමින්
පෝය ගෙවීලා ඇති සිතමින්
පෙට්ටගමේ අඩියට අත දාලා
හැඹිලියෙ ඇති පොඩි සල්ලි ගනින්

අනුර ජයවීර
බදුල්ල

පරාර්ථචර්යා

මසුරුකම් දුරුකරමු නැති බැරි අයට දන්දෙමු
යමක් ඉල්ලා එන අයට ශක්ති පමණින් උදවු කරමු
පිළිසරණ නැති අයට පිහිට පිළිසරණක් වෙමු
ඉන්න තැන නැති අයට ඉන්න තැනකින් ඉඩ දෙමු

නිති පන්සිල් සුරැක පොහොය අටසිල් රකිමු
සිත් පිරිසුදු කරමු බණ භාවනා කරමු
නිතර සිහියෙන් ඉඳිමු සසර දුක් නැති කරමු
ගුණ නැණ දියුණුවට පාරමී දම් පුරමු

හෙයියන්තුඩුවේ ඤාණදස්සි හිමි

අඳුර විනිවිද

වැසුන සඳ – සඳවලා සළුවෙන්
අවට තරුමල් පිපුණු රැයෙහි
එදා රහතන් වැඩිය මාවත
සොයා යනු සොම්නසින් පිබිදී
සසර බැඳි සුදු රැහැන් බිද හැර
සතරමග පල ලබනු සඳහා
සබඳ යනු මැන
අඳුර විනිවිද

හීන්වැල්ලේ
විමල් විජේසේකර