|
ලොකු හාමුදුරුවෝ
අකුසල් දුරැර දන යොමු කළ විට පිනට
රැකුණා අපේ පන්සල ගරු සරු ලෙසට
දැකුමෙන් පවා දුන්නේ සිහිලකි නෙතට
ලොකු හාමුදුරුවෝ මිණි පහනකි ගමට
සඳවත සදිසි පිවිතුරු සොමියුරු ගුණය
මැද හත් බවින් රැකගෙන සිටියා විනය
සිඳ ලූ නිසා හද මැදුරේ අසහනය
ලද දේ පමණි සිත සුවපත් කළ ධනය
රුවට දිලෙන මිරිඟුව තුළ නොමැත දිය
අවට පෙනෙන දියුණුව දැක නිසල විය
ලොවට දැනෙන තරගය නැත සිතට සිය
ගමට තියෙන පැරැණිම ගේ ලැගුම් ගෙය
පවසක් දැනුන සතහට දිය බිඳ ලෙසට
සුවයක් යදින විට ඔසුවක් විය අපට
නිවසක් පිළිවෙළින් කුළුණින් යන කලට
වෙනසක් නැතුව වැඩියා දුප්පත් පැළට
ගත් තීරණ වැරැදි නැත යහපතම මිස
උත්තම මුනි දහම සුරැකී දුරැර දොස
අත්හළ සැපත පිළිබඳ නැත යොමනු ඇස
සෙත් පිරිතක් වගෙයි භාෂිත මිහිරි බස
හැමට එකම මෙත පතුරා ඇසුරු කර
සිතට නිවුණු සිතිවිලි ගෙන විනය ධර
අපට සුසැදි පින්කෙත වූ නමදු වර
ගමට දැනුනෙ නෑ ලද සිව්පසයෙ බර
තලවත්තේ ගෙදර වික්‍රමසිංහ අතපත්තු
අපරාජිත අම්මේ
වැනසෙන තුරුම ලෝකය තුළ පසිඳු වන
ඉවසන හදවතකි සැඟවුණ නිමල දන
සුරතල් වදන් උල්පත වෙයි සිහිල දෙන
මඳහස වුවද ගෙන දෙයි කිරි ගඟක ගුණ
දරු පෙම මිසක නොපතන අන් සැප කවර
කටුකයි අහෝ ඈ යන මේ දිවි කතර
ගෙරවුම් අපමණයි වැදුන තැන නිතර
එනමුත් ගලන සෙනෙහස වි නැහැ නතර
තුරුලිය අතර සුපිපෙන මල් උදයේම
වියැකෙයි සුවඳ මැලවෙයි එම සවසේම
ගනඳුර නිවා දිදුළන පුන් සඳ සේම
අපරාජිතයි අම්මේ ඔබෙ ගුණ පේම
ධනසිංහ පියදිගමගේ
තැන්නකඩේ , උඩිස්පත්තුව
උපහාරය
සොඳුරු පබසර පසන් සිරියෙන් පුබුදුවා වත නිරන්තරයෙ ම
අඳුරු මොහදුක් සසර බැඳ ඇති පළවමින් නිති දුරින් දුරට ම
විදුරු නැණ බල උරුම කරගෙන වෙසෙන හද බැඳි දනන් අතර ම
ඇඳුරු පඩි හිමියනේ නමදිමි චිරං ජයතු කියා නිතර ම
අමිල මෙත් කරුණා ගුණය හැම සතන් වෙත පතුරමින් හැමදින
නිමල දිවි පැවතුමෙන් සිරිතෙන් බුදු පුතෙකු විලසින්ම පැවතෙන
විමල සර තල්ගස්වැවේ මහ තෙරිදුණේ දිගු ආයු විඳිමින
කමල සුවඳින් සුවඳවත් වේවා ඔබේ දිවි ගමන දින දින
උතුරු මැද ප්‍රධාන අධිකරණ සංඝනායක තල්ගස්වැවේ විමලසාර පණ්ඩිත හිමියන් වෙ ත කෙරෙන
උපහාරයයි.
කපුරුබණ්ඩාර පියතිලක
මෙත් වඩමු
මිය ගියත්
යළි යළිත්
උපදිනව නම් බවේ
හතර රියනක් සැමට
හිමි වෙනවමයි ඉබේ
කුමට එකිනෙකා වෙත
ගැටුම් ගැරහුම් ලොවේ
සැමට මෙත පතුරවමු
නිවන් පුර දොර ඇරේ
දයානන්ද පොන්නම්පෙරුම
ගොඩගම
වට්ටාරම තතු පැහැදී නමදිමු
තෙවරක් බුදුහු වැඩිය සිරිලක් රටට
මගගොස් රහත් බව ලැබූ මලියදෙව් හිමිට
ආරාමයක් වූ වට්ටාරම සැමගේ පිනට
අපි ගොස් වදිමු නිර්මල ඒ තෙරුවනට
අජිත් වික්‍රමනන්ද වීරසූරිය
මොරගොල්ල, ඉඹුල්ගස්දෙණිය.
භාවනාව
ආයුෂ වර්ණ සැප බල හා ප්‍රඥාව
වැඩි වර්ධනය වී දුරුවී තණ්හාව
ලැබගෙන යස ඉසුරු සමඟින් හිනාව
භාවනා කරන්න සැමදා හුදෙකලාව
වැලිකලගේ සිරිපාල කීරන්තිඩිය මතුගම
මම වැඳ වැටෙමි
අවුකන බුදු පිළිමෙ ළඟ
අඩවන් වූ දෙනෙත මිහිකත දෙස අරවා
බොදු සිත් අවදිකර කෙලෙසුන් දුරු කරවා
සම්බුදු රැසින් මුළු පරිසරයම නහවා
අවුකන පිළිම සමිඳුන් සම්බුදු භගවා
තුන්ලෝ සතට බෙදමින් දම් අමා ගඟ
දුක් ගිනි නිවාලා හෙළි කළ නිවන් මඟ
ලෝක විදු බුදු සමිඳුනි තිලොව අග
මම වැඳ වැටෙමි අවුකන බුදු පිළිමෙ ළඟ
සෝමාවතී
තිසරණ වැඩිහිටි සමිතිය,
අලව්ව |
