|
අස්ගිරි පාර්ශ්වයේ මහානායක ධුරයෙන් පිදුම් ලද වරකාගොඩ ඥානරතන මහා නා හිමි
ස්‍යාමෝපාලි මහා නිකායේ අස්ගිරි මහා විහාර පාර්ශ්වයේ මහානායක පදවියට බදුලු මුතියංගණ
රජමහා විහාරාධිපති අස්ගිරි පාර්ශ්වයේ අනුනායක අතිපූජ්‍ය වරකාගොඩ ධම්මසිද්ධි ශ්‍රී
පඤ්ඤානන්ද ඥානරතනාභිධාන මහා නාහිමියෝ පත්වූහ.
 අස්ගිරි මහා විහාර පාර්ශ්වයේ විංසත් වර්ගික කාරක මහා සංඝ සභාවේ සමානච්ඡන්දයෙන්
මහපදවියට පත්වූ ඥානරතන නා හිමියෝ පුරා දශක 6 කට වැඩිකාලයක් කසාවත දරමින් ජාතික,
ආගමික හා ශාසනික වශයෙන් සුවිශාල මෙහෙවරක් කළ මහා යතිවරයාණන් වහන්සේ නමකි.
අභිනව මහනාහිමියෝ අස්ගිරි පාර්ශ්වයේ උරුලෑවත්තේ සඟ පරපුර නියෝජනය කරමින් පත්වූ දහවන
මහ නාහිමියන් වන අතර මහ පදවියට පත්වීමට ප්‍රථම උන්වහන්සේ මාස 11 ක පමණ කාලයක්
අනුනායක ධූරයේ කටයුතු කළහ.
අභිනව මහනාහිමියන් මෙම උතුම් පදවියට පත්වූ අපේ‍්‍රල් 07 දින විංසත් වර්ගික කාරක සංඝ
සභික හිමිවරු අස්ගිරි මහා විහාරීය මංගල උපෝෂථාගාරයට රැස්ව සියලු දෙනා වහන්සේගේ සම
කැමැත්තෙන් මහානායක ධුරයට ඥානරතන හිමියන් පත්කර ගනු ලැබූ අතර උන්වහන්සේ පදවියට
පත්වීමෙන් පසු විජිණිපත පිළිගැන්වීම අස්ගිරි පාර්ශ්වයේ අනුනායක පොළොන්නරුව
සොළොස්මස්ථානාධිපති වේඬරුවේ උපාලි නා හිමියන් විසින් සිදුකරනු ලැබූහ.
මහා නාහිමියන් පැවිදි දිවියට ඇතුළත්ව ඇත්තේද මෙයට වසර 61 කට පෙර අපේ‍්‍රල් 07
වැනිදාවකම වීම විශේෂිතය.
1942 මාර්තු මස 18 දින හාරිස්පත්තුව වරකාගොඩ දූල්දෙණිය රාජකරුණා නවරත්න අතපත්තු
වාසළ මුදියන්සේලාගේ මුදියන්සේ සහ හිඟුල්වල අලකොළදෙණියේ දුක්ගන්නා රාළලාගෙ පිංචි
අම්මා යන දෙපළට දාව එම පවුලේ තෙවැන්නා ලෙස උපත ලැබ ඇති මහනාහිමියෝ 1955 අපේ‍්‍රල්
මස 07 දින අස්ගිරි මහා විහාරීය මංගල උපෝෂථාගාරයේදී පැවිදි බිමට පිවිස ඇත.
1962 ජුනිමස 09 දින අධිශීල සංඛ්‍යාත උපසම්පදා ශීලයෙහි පිහිටුවන ලැබ ඇති ඥානරතන
හිමියෝ 1990 අස්ගිරි පාර්ශ්වයේ විංසත්වර්ගික කාරක සංඝ සභාව නියෝජනය කිරීමේ වරම්
හිමිකරගෙන තිබේ. වසර 2006 දී උපාධ්‍යාය පදවියට පත් උන්වහන්සේ ජ්‍යෙෂ්ඨ කාරක සංඝසභික
ධුරයට පත්වූයේ 2009 වසරේදීය.
1970 දී විද්‍යාලංකාර විශ්වවිද්‍යාලයෙන් ශාස්ත්‍රවේදී උපාධියද ලත් මහානාහිමියෝ
විනයධර, ධර්මධර හිමිනමකි. සඟ සසුනේ උන්නතිය වෙනුවෙන් චිරාත් කාලයක් සේවය කරන්නට
අභිනව මහානායක ස්වාමින්ද්‍රයන් වහන්සේට ශක්තිය ධෛර්යය ලැබේවායි ප්‍රාර්ථනා කරමු.
අසේල කුරුළුවංශ |
