ගැටබරු දුරුතු මහා ආශිර්වාද පූජාව

එළඹෙන 2016 නව වසර රටටත්, ජනතාවටත්, ලක් රජයටත්, සෙත් ශාන්තිය ප්‍රාර්ථනා කරමින් 60 වෙනි වරටත් අඛණ්ඩව කොටපොල ගැටබරු රජමහා විහාර පුජා භූමියේ පවත්වනු ලබන දුරුතු මහා ආශිර්වාද පූජාව මෙවරත් ගැටබරු රජමහා විහාරාධිපති ස්‍යාමෝපාලි මහානිකායේ මල්වතු මහා විහාර පාර්ශ්වයේ දක්ෂිණ ලංකාවේ ද්විතීය සංඝනායක ධර්ම කීර්ති ශ්‍රී රතනපාල ශාස්ත්‍රවේදි පණ්ඩිත බෙරලපනාතර චන්දවිමල නාහිමියන්ගේ අනුශාසනා පරිදි ගැටබරු රජමහා විහාර කෘත්‍යාධිකාරි උඩමළුව තේවාව භාර ආචාර්ය කිරින්දේ ආනන්ද හිමියන්ගේ මෙහෙයවීමෙන් සහ මඟපෙන්වීමෙන් පවත්වනු ලැබේ.

සෑම වර්ෂයකම වාගේ මෙවරද ළිඳගාවහේන, දීපාලෝක තරුණ බෞද්ධ සමිතිය මෙවරත් එම පින්කම පෞරාණික පුද පිළිවෙත් අනුව පැවැත්වීමට කටයුතු සූදානම් කර ඇත. ඒ අනුව 2016 නව වසර උදාවත් සමඟ ජනවාරි 01 වෙනිදා දවස පුරා පින්කම් රාශියක් පැවැත්වීමට කටයුතු සංවිධානය කර ඇත. එදින උදෑසන ආරම්භ වන හැට පැයේ හේවිසි ශබ්ද පූජාව, පෞරාණික පුද පිළිවෙත් අනුව සිදුකරනු ලබන කිරි ආහාර පූජාව, දහවල සංඝගත දක්ෂිණාව සවස බෝධි පූජාව අසු හාරදහයේ පහන් පූජාව, විශේෂ දේව පූජාව ආදි පින්කම් රාශියක් පැවැත්වේ.

තෙරුවන් මුල් කරගනිමින් පවත්වනු ලබන එම පින්කම තුළින් සමස්ත ශ්‍රී ලංකාවාසී ජනතාවගේ නොමඳ ගෞරවයට හා ඉමහත් භක්තියට පාත්‍රවී ඇති ගැටබරු රජ්ජුරු බණ්ඩාර දෙවිදුන්ගේ පිහිට, ආරක්ෂාව හා රැකවරණය ලබා ගන්නා ලෙස ගැටබරු රජමහා විහාර කෘත්‍යාධිකාරි ආචාර්ය කිරින්දේ ආනන්ද ස්වාමීන් වහන්සේ බැතිමතුන්ගෙන් ඉල්ලා සිටී.