මහනුවර ඇසළ මහා පෙරහර 29 වැනිදා

කේ.බණ්ඩාරනායක

මහනුවර ඇසළ මහ පෙරහරේ අවසන් රාත්‍රි මහා පෙරහර හා දියකැපුම් පෙරහර අගෝස්තු 29 වැනිදා නිකිණි පුර පසළොස්වක පෝදා පැවැත්වේ. 29 වැනිදා 7.59 ට රාත්‍රී උතුරු දිශාභිමුඛව පෙරහර ශ්‍රී දළදා මාළිගාව අසලින් පිටත්ව දළදා වීදිය යටිනුවර වීදිය, කන්දේ වීදිය,ඩී.එස්.සේනානායක වීදිය, ඔස්සේ ගමන්කර රජවීදිය දිගේ ඉහළටවිත් ගෙවදී.

දිය කැපුම් පෙරහර 30 අලුයම 01.02 ට උතුර දිශාභිමුඛව මාළිගාව පෙරහර සිව්දේවාල පෙරහර සමඟ පිටත්ව ගෙඩිගේ රජ මහා විහාරයට ගොස් සිරිත් ප්‍රකාර කරඬුව එහි තැන්පත් කර සිව්දේවාල පෙරහර ආපසු දේවාලවලට පැමිණ දේවපූජා පවත්වා ගැටඹේ දියතොටු- පොළටවිත් දියකැපුම් මංගල්‍යය සිදුකොට ආපසු ගණදෙවි කෝවිලට විත් දේව පූජා පවත්වනු ඇත. සිරිත් පරිදි 30 වෙනිදා දහවල් 11.50 ට ගණදෙවි කෝවිලෙන් පිටත්වන සිව්දේවාල පෙරහර සවස 2.14 ට ගෙඩිගේ විහාරයෙන් පිටත්වන මාළිගාවේ පෙරහර පෙරටු කරගෙන ඩී.එස්.සේනානායක වීදිය, පන්සල පාර, දේව වීදිය, රජ වීදිය දිගේ ගමන් කර මාළිගා චතුරශ්‍රයේ ගමන්කර සවස 4.20 ට වයඹ බලා ගෙවදී.

සම්ප්‍රදාය අනුව පෙරහර පුවත ජනාධිපතිතුමාට සැලකිරීමට දියවඩන නිලමේ ප්‍රධාන බස්නායක නිලමේවරුන් පෙරහරෙන් ජනාධිපති මන්දිරයට ගොස් දියවඩන නිළමේතුමා සංදේශය ජනාධිපතිතුමාට පිළිගන්වනු ලබයි.