සමස්ත ලංකා සිසු නිපුණතා ඇගයීම්
අපේ‍්‍රල් මස 9, 10, 11 දිනවල කළුතර දී
බෞද්ධ කටයුතු දෙපාර්තමේන්තුව සහ සමස්ත ලංකා ශාසනාරක්ෂක මණ්ඩලය මඟින්
වාර්ෂිකව පවත්වනු ලබන සමස්ත ලංකා දහම් පාසල් සිසු නිපුණතා ඇගයීම් (2014
වසර) කළුතර පස් යොදුන් රට ජාතික අධ්‍යාපන විද්‍යාපීඨයේ දී අප්‍රේල් මස
9, 10, 11 දිනවලදී පැවැත්වීමට කටයුතු යොදා ඇත.
දිස්ත්‍රික් 22ක දිස්ත්‍රික් නිපුණතා ඇගයීම්වලින් ජයග්‍රහණය කළ දහම්
පාසල් සිසු දරුවන් 850ක් පමණ එම නිපුණතා ඇගයීම් සඳහා සහභාගිවන අතර එම
සිසුන්ගේ භාරකරුවන් සමඟ පැමිණ අප්‍රේල් 9 වන දා සවස නේවාසික විය යුතුව
ඇත.
නේවාසික පහසුකම් ජාතික අධ්‍යාපන විද්‍යාපීඨය, කළුතර මියුසියස්
විද්‍යාලය, උග්ගල්බඩ මහා විද්‍යාලය, තිස්ස මහා විද්‍යාලය (ජාතික පාසල)
කළුතර බාලිකා මහා විද්‍යාලය (ජාතික පාසල) යන ස්ථානයන්හි නේවාසික
පහසුකම්, සිසුන්ට හා දෙමව්පියන්ට ලබාදීමට කටයුතු යොදා ඇති බව සමස්ත
ලංකා ශාසනාරක්ෂක මණ්ඩලයේ ප්‍රධාන ලේඛකාධිකාරී ගෝනදූවේ ගුණානන්ද
නාහිමියෝ ‘බුදුසරණ’ට පැවසූහ. සිසු නිපුණතා ඇගයීම් වැඩසටහන අප්‍රේල් 10
වනදා කළුතර පස්යොදුන් රට ජාතික අධ්‍යාපන විද්‍යාපීඨයේ දී පැවැත්වෙන අතර
එදින පෙරවරුවෙහිදී දෙමව්පියන් සඳහා විශේෂ සම්මන්ත්‍රණයක්ද පැවැත්වීමට
කටයුතු යොදා ඇත. මහාචාර්ය දයා රෝහණ අතුකෝරාල මහතා විශේෂ දේශනයක්ද එහිදි
පැවැත්වේ.
පස්වරු 4 ට කළුතර අලුත්ගම ඓතිහාසික කන්දේ විහාරස්ථානය හා කළුතර බෝධීන්
වහන්සේ වැඳ පුදා ගැනීමට සහ විශේෂ බෝධි පූජාවක් සිසුන් හා ගුරු
දෙගුරුන්ගේ සහභාගිත්වයෙන් පැවැත්වෙන බවද ගෝනදූවේ ගුණානන්ද නා හිමියෝ
පැවසූහ. අප්‍රේල් 11වන දා උදේ 8ට සිසු නිපුණතාවලින් ජයග්‍රහණ ලැබූ
සිසුන්ට ත්‍යාග හා සහතික පත්‍ර ප්‍රදානය අතිපූජ්‍ය මහානායක ස්වාමීන්
වහන්සේලාගේ ප්‍රධානත්වයෙන් ජනාධිපතිතුමා ප්‍රමුඛ මැති ඇමැතිවරුන්ගේ
සහභාගීත්වයෙන් පැවැත්වීමට කටයුතු සංවිධානය කෙරෙන බවද උන්වහන්සේ
පැවැසූහ.
කළුතර දිස්ත්‍රික් ශාසනාරක්ෂක මණ්ඩලය ඇතුළු දිස්ත්‍රික්කයේ සියලු
ශාසනාරක්ෂක මණ්ඩල (17) සභාපති, ලේඛකාධිකාරී ස්වාමීන් වහන්සේලා ඇතුළු
ශාසනාරක්ෂක මණ්ඩල නියෝජිතයන් ඇතුළු කළුතර දිස්ත්‍රික් ලේකම්තුමා
ප්‍රමුඛ ප්‍රාදේශීය ලේකම්වරුන්ගේ අනුග්‍රහයද සෞඛ්‍යය හා දේශීය වෛද්‍ය
අමාත්‍ය දොස්තර රාජිත සේනාරත්න මහතාගේ මූලිකත්වයෙන් දේශපාලන අධිකාරියේ
සහාය ද එම නිපුණතා ඇගයීම් වැඩසටහන සඳහා සහාය ලබාදී ඇතැයිද ගුණානන්ද
හිමියෝ පැවසූහ.
|
