කතරගම මහ දේවාලයේ වාර්ෂික පෙරහර

ඊ.එච්. සෝමපාල, කතරගම විශේෂ

රුහුණු කතරගම මහාදේවාලයේ වාර්ෂික අවුරුදු මංගල්‍ය පෙරහර පෞරාණික චාරිත්‍ර පුද සිරිත් වලට මුල් තැනක් දෙමින් මෙම 14 වැනිදා උඩරට පහතරට මෙන්ම රුහුණු ප්‍රදේශයට ආවේනික නැටුම් වලින් හා අලි ඇතුන්ගෙන් යුතුව ඉතාමත් අලංකාර ලෙස පැවැත්වීමට රුහුණු කතරගම මහාදේවාලයේ බස්නායක නිලමේ ඌව පළාත් සභා ප්‍රධාන ඇමැති ශෂීන්ද්‍ර රාජපක්‍ෂ මහතා කටයුතු සංවිධානය කර ඇත.

මහාදේවාලයෙන් ඇරඹෙන දේව පෙරහර ගණදේවාලය කිරිවිහාරය ඉදිරිපිටින් අෂ්ඨඵල බෝධීන් වහන්සේ පුදක්ශිණකර මහ වාසල් දොරටුවෙන් මහාවීදියට පිවිසේ. එම වීදියේ ශ්‍රී අභිනවාරාම විහාරස්ථානය ඉදිරිපිටින් ගමන්කර පෙරහර වල්ලි අම්මා දේවාලයට පැමිණේ. පෙරහර මහාදේවාලයට පැමිණීමෙන් පසුව ‘දැකීම් තැබීම’ නම් පෞරාණික චාරිත්‍රයක් කතරගම මහාදේවාලයේ කපු මහත්වරුන් විසින් ඉටු කරනු ලබයි. මහාදේවාලයේ දේව තීරයෙන් ඇතුළත ඇති පූජා වස්තුන් යම් ප්‍රමාණයක් රිදී බන්දේසියක තබාගෙන කපුමහත්මයෙකු බැතිමතුන් සිටින ‘මිණි බැදි මංඩපය’ට පැමිණ එම පූජා වස්තූන් පිළිබඳ විස්තරයක් ප්‍රකාශ කරයි.

පෙරහර සමයේ කතරගම පුදබිමට පැමිණෙන බැතිමතුන්ට අවශ්‍ය පහසුකම් සැලසීමට කතරගම ප්‍රාදේශීය සභාව ප්‍රාදේශීය ලේකම් කාර්යාලය නාගරික සංවර්ධන අධිකාරිය භෞතික සැලසුම් දෙපාර්තමේන්තුව, සෞඛ්‍ය වෛද්‍ය නිලධාරී කාර්යාලය හා කතරගම පොලීසිය කටයුතු සංවිධානය කර ඇත.