ධම්මපද සැහැල්ල - 32 කොටස

බණ්ඩාර මඩුගල්ලේ

141. න නග්ග චරියා න ජටා න පංකා -නානාසකා ථණ්ඩිල සායික වා
රජෝ ච ජල්ලං උක්කුටිකප්පධානං - සොධෙන්ති මච්චං අචිතිණ්ණකංඛං

අඳ බාල තැනැත්තෝ, නොයෙක් පිළිවෙත් රකිති. එහෙත් නිකෙලෙස් බවක්, කිසිදාක හිමි නොවේ.

හිතවතුනි, නැණවතුන්, ඇසුරේ ම හැසිරෙන්න. එවිට ඔබ උසස් බව වෙතට ළං වන්නේ ය.

142. අලංකතො චෙ පි සමං චරෙය්‍ය - සන්තෝ දන්තෝ නියතෝ බ්‍රහ්මචාරී
සබ්බේසු භුතෙසු නිධාය දණ්ඩං - සො බ්‍රාහ්මණො සො සාමණො සභික්ඛු.

යම් කෙනෙකු සංවරව, නිවන් මඟ හැසුරුණොත් මහා පුද ලබන්නට, සුදුසු මිනිසා ඔහු ය.

හිතවතුනි, උසස් ගුණ ඇති අයට ලෝකයා හිස නමා ගරු සිතින්, නිතර පූජා කරති.

143. හිරි නිසේධො පුරිසො - කෝචි ලොකස්මිං විජ්ජති,
යො නින්දං අප්පබොධේති – අස්සෝ භද්‍රෝ කසාමි ව

ලජ්ජාව නිසාවෙන්, පාපයෙන් මිදෙන්නේ මේ ලෝකයේ සිටින, ඉතාමත් ටික දෙනෙකි.

හිතවතුනි, ‘පවක්’ යනු, ඉතා ලොකු වැරැද්දකි. වැරැද්දක් නොකිරීම උස් මිනිස් යුතුකමකි.

144. අස්සො යථාභද්‍රෝකසානිවිට්ඨො - ආතාපිනොසංවෙගිනො භවාථ
සද්ධාය සීලෙන ච වීරියේන ච - සමාධිනා ධම්ම විනිච්ජයෙන ච
සම්පන්නවිජ්ජාචරණ පතිස්සතා -පහස්සථදුක්ඛමිදං අනප්පකං

සසර ගැන කලකිරී, කෙලෙස් නැති කරන්නට, මහා නැණවතකු ලෙස ජීවිතය ගෙන යන්න.

හිතවතුනි, ටිකෙන් ටික, වැරැදි අඩු කර ගන්න. ඒ අනුව ලෝකයා ඔබට හිස නමනු ඇත.

145. උදකං හි නයන්ති නෙත්තිකා - උසුකාරා නමයන්ති තේජනං
දාරුං නමයන්ති තච්ඡකා - අත්තානං දමයන්ති සුබ්බතා’ති

ගොවි දනෝ මනා ලෙස, දිය දහර හසුරුවා, තමාගේ ගොවිතැනින් මහා අස්වනු ලබති. ලී දඬුව මනා ලෙස හසුරුවන වඩුවෝ ද ලෝකයට වුවමනා මහඟු ලී බඩු තනති. ඒ පරිද්දෙන් නැණැති ගුණැති වූ තැනැත්තෝ අකුසලයට යා නොදී සිත හසුරුවා ගනිති.

හිතවතුනි, අකුසලට නොයන සිත කප් රුකකි. මෙලොව පරලොව දෙකට සැප ගළන උල්පතකි.

මතු සම්බන්ධයි