ශ්‍රී රෝහණ මහා සංඝ සභාවේ
උපසම්පදා උළෙල මැයි 1,2,3
ස්‍යාමෝපාලි වංශික මහා නිකායේ ශ්‍රී රෝහණ මහා සංඝ සභාවේ 25 වන
උපසම්පදාවාරය එනම් “රජත ජයන්තිය” 2600 සම්බුද්ධත්ව ජයන්තිය නිමිතිකර
උත්සවශ්‍රීයෙන් පැවැත්වීමට ශ්‍රී රෝහණ මහාසංඝ සභාවේ මහානායක අත්තුඩාවේ
ශ්‍රී රාහුලාභිධාන මහා ස්වාමීන්ද්‍රයන් වහන්සේගේ ප්‍රධානත්වයෙන් 2010
පෙබරවාරි මස 07 වන දින මාතර පහළ පීක්වැල්ල ශ්‍රී පන්ථාරාම විහාරස්ථානයේ
දී පැවති සානුනායක ත්‍රිංසත් වර්ගික විධායක කාරක සභාවේ රැස්වීමේදී
ඒකමතිකව තීරණය විය.
එදින විධායක සභා තීරණය පරිදි එම සංඝ සභාවේ 25 වන උපසම්පදාව 2010 මැයි
මස 01, 02 හා 03 යන තෙදින පුරා පැවැත්වෙන බව ප්‍රධාන ලේඛකාධිකාරී
ශාස්ත්‍රපති ඕමාරේ කස්සප හිමියන් නිකුත් කළ නිවේදනයක දැක්වෙයි.
මාතර කොටුවේගොඩ ශ්‍රී රෝහණ උපෝෂථාගාර මහා විහාරස්ථානයේ දී ශ්‍රී රෝහණ
උපසම්පදාව ලබා ගැනීමට අපේක්ෂා කරන ශ්‍රී රෝහණ මහා සංඝ සභාවේ සාමාජික
විහාරස්ථාන වලින් ඒ සඳහා ඉල්ලුම්පත් කැඳවන අතර ඉල්ලුම්පත් භාර ගන්නා
අවසාන දිනය වනුයේ 2010 අප්‍රේල් මස 01 දිනයි.
උපසම්පදාපේක්ෂකයන් වහන්සේලා උදෙසා 2010 අප්‍රේල් මස 24,25 හා 26 යන
තෙදින තුළ තිහගොඩ, ඌරාපොළ, ශ්‍රී රෝහණ මහා සංඝ සභා මූලස්ථානයේ දී
භික්ෂු විනය හා උපසම්පදාව සම්න්ධව නේවාසික වැඩමුළුවක් හා එම වැඩමුලුව
අවසානයේ තදානුබද්ධ ධර්‍ම විෂය ඥාන පරීක්ෂණයක් පැවැත්වීමට කටයුතු
සංවිධානය කර ඇත.
මීට අමතරව 25 වන රජත ජයන්තිය සැමරීම් වස් පුද්ගල හා සමාජමය වශයෙන් රටට,
ලොවට විශාල සේවාවක් කළ දේශීය හා විදේශීය විද්වතුන්ට ගරුනාම පිදීමට ද,
විද්වත් ලිපි එකතුවකින් යුතු විශේෂ ශාස්ත්‍රීය ග්‍රන්ථයක් ප්‍රකාශයට
පත්කිරීමට ද, ශ්‍රී රෝහණ පුවත්පතෙහි සංවත්සර කලාපය නිකුත් කිරීමට හා
සංඝ සභාවේ නිර්මාතෘ පුරාවිද්‍යා චක්‍රවර්ති අතිපූජ්‍ය කඹුරුපිටියේ
වනරතනාභිධාන මහනාහිමිගේ ගුණ සමරු වැඩ සටහන් රැසක් ද පැවැත්වීමට තීරණය
කර ඇතැයි කියති.
උපසම්පදාපේක්ෂක ඉල්ලුම්පත් 2010 අප්‍රේල් මස 01 දිනට පෙර එවිය යුතු
ලිපිනය වනුයේ
ප්‍රධාන ලේඛකාධිකාරී
ශ්‍රී රෝහණ මහා සංඝ සභාව
ශ්‍රී රෝහණ උපෝසථාගාර මහාවිහාරය
රන්දුපත
කොටුවේගොඩ, මාතර යන ලිපිනයට බවද ඕමාරේ කස්සප හිමියන්ගේ නිවේදනයේ
දැක්වේ. |
