සෙත් සුව සලසන මෙත් සිත

මෙලොවදීත් මෛත්‍රී කිරීමෙන් සැප විඳීමට හැකි බව මේ දේශනා පාඨවලින් මනාව පැහැදිලි වේ. ‘සුඛං සුපති’ බොහෝම හොඳට නින්ද යනවා. එසේම ‘සුඛං පටිභුජඣති’ උදේට සැපසේ ඇහ ඇරෙනවා. ‘නපාපකං සුපිනං පස්සති’ නපුරු හීන දැකීමෙන් බය වන්නේ නෑ. ‘මනුස්සානං පියො හෝති’ මිනිසුන්ට පි‍්‍රය මනාප පුද්ගලයෙක් ලෙස කවුරුත් ඇසුරට ගන්නවා. එසේම ‘අමනුස්සානං පියෝ හෝති’ අමනුස්සයින්ටත් පි‍්‍රය මනාප ලෙස ලැදිකමක් ඇතිවනවා. ‘දේවතාරක්ඛන්ති’ දෙවියෝ රකිනවා.

එගොඩඋයනේ විදර්ශනාරාම
මූල මහා විහාරාධිපති,
විනයාචාර්ය
දෙහිගම විනයපාල නා හිමි

නමෝ තස්ස භගවතෝ අරහතෝ
සම්මා සම්බුද්ධස්ස
අචඡරා සංඝාත මත්තමපි චෙත
භික්ඛවෙ භික්ඛු මෙත්තං
චිත්තං ආසෙවති අයං වුච්චති
භික්ඛවෙ භික්ඛු
අරිත්තජජානො විහරති සත්ථු
සාසනකරො ඔවද
පතති කරො අමොඝං රඪ පිණ්ඩං
භුඤජති කො ජන
වාදො යේතං බහුලීකරොන්තීති.

පින්වතුනී,

ඉහත සඳහන් කළේ භාග්‍යවත් සම්මා සම්බුදුරජාණන් වහන්සේ විසින් දේශනා කරන ලද සූත්‍ර ධර්මයක්. මෙම සූත්‍ර ධර්මය අංගුත්තර නිකායේ ඒකක නිපාතයට අයිති සූත්‍ර ධර්මයක්. මෙම සූත්‍ර ධර්මයෙන් ප්‍රකාශ වන්නේ භික්ෂුන් වහන්සේ නමක් විසින් අසුරසනක් ගසන කාලයක තුළින් වත් මෛත්‍රී සහගතව වාසය කරනවා නම් එම භික්ෂුව ධ්‍යාන නොවැඩුවත් ධ්‍යාන වඩන ලද භික්ෂුවක් ලෙසත් බුදුරජාණන් වහන්සේගේ අවවාද අනුශාසනා පිළිපදින යහපත් භික්ෂුවක් ලෙසත් දායකයින්ගේ සිව්පසය පිළි ගැනීමට සුදුසුවූත් ප්‍රමාණ නොකළ හැකි පින් ලබා ගැනීමට හැකිවූත් යහපත් මෛත්‍රී සහගත භික්ෂුවක් බවත් මම ප්‍රකාශ කරමියි යනුවෙන් බුදුරජාණන් වහන්සේ මේ සූත්‍ර දේශනාව දේශනා කළ සේක.

මෙයින් පින්වතුනි, මෛත්‍රී‍්‍ර වැඩීමේ වටිනාකම ගැන මනාව සිතීමටත් එසේ සිතමින් එම මෛත්‍රීය සියලුම සත්ත්වයින් කෙරෙහි දැක්වීමටත් එම දැක්වීම නිසා ඒ තුළින් භික්ෂූන් වහන්සේට හෝ ගිහි පින්වත් පිරිසට හෝ උතුම් නිර්වාණ සුවයට පත්වීමට හැකි බවත් බුදුරජාණන් වහන්සේ දේශනා කළ සේක.

පින්වතුනී, මෙලොවදීත් මෛත්‍රී කිරීමෙන් සැප විඳීමට හැකි බව මේ දේශනා පාඨවලින් මනාව පැහැදිලි වේ. ‘සුඛං සුපති’ බොහෝම හොඳට නින්ද යනවා. ඉතාමත් සැප සේ එසේම ‘සුඛං පටිභුජඣති’ උදේට සැපසේ ඇහ ඇරෙනවා. ‘නපාපකං සුපිනං පස්සති’ නපුරු හීන දැකීමෙන් බය වන්නේ නෑ. ‘මනුස්සානං පියො හෝති’ මිනිසුන්ට පි‍්‍රය මනාප පුද්ගලයෙක් ලෙස කවුරුත් ඇසුරට ගන්නවා. එසේම ‘අමනුස්සානං පියෝ හෝති’ අමනුස්සයින්ටත් පි‍්‍රය මනාප ලෙස ලැදිකමක් ඇතිවෙනවා. ‘දේවතාරක්ඛන්ති’ දෙවියෝ රකිනවා.

මෛත්‍රී කරන අය දෙවියෝ වඩාත් ආරක්ෂා කරති. එසේම පින්වතුනි, ‘න ස්ස අග්ගිවා විසංවා සත්තංවා ඛමති’ වස විෂ ආදියෙන් අවි ආයුධ වලින් කිසිම හිරිහැරයක් සිදු කරන්න බෑ. මෛත්‍රී වඩන ඕනෑම කෙනෙකුට මෛත්‍රීයේ ඇති යහපත් ගුණය නිසා හිරිහැර කරදර වැලකිලා යනවා. ‘මුඛවණොණා විප්පසීදති’ මුහුණ දකින දකින අයට පි‍්‍රයමනාප ගතියකින් යුක්ත වෙනවා.

‘අසමමූළෙහා කාලං කරෝති’ සිහි කල්පනාවෙන් යුතුව මැරෙන්න පුළුවන් වෙනවා. එවිට සුගතියක ඉපදීමටත් එම හිත බලපානවා. දෙව්ලොව වැනි තැනකට පත්වෙනවාමයි. ‘අත්තරිං අප්පටි විජ්ජනොතා බ්‍රහ්ම ලොකූපගොහොති’ නොවරදවා ම දිව්‍ය ලෝකයේ හෝ බ්‍රහ්ම ලෝකයේ ඉපදීමට මෛත්‍රීය වැඩීමෙන් හැකි බව බුදුරජාණන් වහන්සේ දේශනා කළ සේක. මෙලොවත් පරලොවත් දෙකේදීම සැප විඳීමට ලැබී අවසානයේදී දුක් නොවිඳ සියලු කෙළෙස් ප්‍රහීණ කොට බුදු පසේ බුදු මහරත් උතුමාණන් වහන්සේලා නිවී සැනසී පැමිණ වදාළ අජරාමර අමා මහ නිවන් ලැබීමට හේතු වෙනවාමයි. එසේම හේතු වේවායි ප්‍රාර්ථනා කටයුතුයි. සියලු සත්ත්වයෝ නිදුක් වෙත්වා! නිරෝගි වෙත්වා! සුවපත් වෙත්වා! දුකින් මිදෙත්වා! නිවන් දකිත්වා!