කේශ ධාතුන් වහන්සේ රුහුණු පුරවරයට වැඩම වූ වගයි

එච්.ඩී. සුරේන්ද්‍ර

බංග්ලාදේශයේ චිතගොන් විහාරයේ සිට හුණුපිටිය ගංගාරාම විහාරස්ථානයට වැඩම කරවා එහි තැන්පත් කර තිබෙන සර්වඥකේශ ධාතුන් වහන්සේ ඉකුත් දා ගංගාරාමයේ සිට ජනාධිපති මන්දිරයට වැඩම කිරීමෙන් අනතුරුව ජනාධිපති මහින්ද රාජපක්ෂ මැතිතුමා විසින් එම කේශ ධාතුන් වහන්සේ වන්දනා කරන ලදී.අනතුරුව කළුතර බෝධිය අලුත්ගම කන්දේ විහාරය ගාල්ල ඔස්සේ මාතර බෝධිය වෙත කේශධාතුන් වහන්සේ රැගත් රථ පෙරහර පැමිණ මහජනයාට වන්දනා කිරීමට යොමු කළහ.

මාතර වෙහෙරහේන රාජ මහා විහාරයේ ද දින දෙකක් එම කේශ ධාතුන් වහන්සේ වන්දනා මාන කිරීමට බැතිමතුන් උදෙසා වෙහෙරහේන රජමහා විහාරයේ විහාරාධිපති කෑගල්ලේ රතනසාර හිමියන් විසින් පහසුකම් සලසා දුන්හ.

සර්වඥ කේශධාතුන් වහන්සේ ප්‍රවාහන අමාත්‍ය ඩලස් අලහප්පෙරුම මහතාගේ ප්‍රධානත්වයෙන් වෙහෙරහේනට වැඩම කර වූ අතර, පසුව සංස්කෘතික ඇමැති මහින්ද යාපා අබේවර්ධන මහතා සහ ජනමාධ්‍ය ඇමැති ලක්ෂ්මන් යාපා අබේවර්ධන මහතා මාතර පුරපති උපුල් නිශාන්ත මහතා මාතර දිස්ත්‍රික් ලේකම් ගාමිණී ජයසේකර මහතා ඇතුළු මහා සංඝරත්නයද දහස් සංඛාත බැතිමත් මහජනතාවද විසින් වැඳ පුදා ගනු ලැබිණි.

ඒ නිමිත්තෙන් වෙහෙරහේන විහාරස්ථානයේ සති පිරිත් දේශනාවක් පවත්වා රටටත්, මහජනතාවටත්, ජනාධිපතිතුමා ඇතුළු මැති ඇමැතිවරුන්ටත් ත්‍රිවිධ හමුදාවේ සහ පොලිස් නිලධාරින්ටත් සෙත්පතා රටේ සාමය ප්‍රාර්ථනා කැරිණි . අනතුරුව කේශධාතුන් වහන්සේ කතරගම කිරිවෙහෙර රජ මහා විහාරය දක්වා වැඩම කරවා, කිරි වෙහෙර අබියස දින දෙකක් බැතිමතුන්ට වන්දනා කිරීමට ඉඩ සැලසූහ.

එම අවස්ථාවට අමාත්‍ය චමල් රාජපක්ෂ මහතා හා කතරගම බස්නායක නිලමේ ශෂින්ද්‍ර කුමාර රාජපක්ෂ මහතා සමග කිරිවෙහෙර රජ මහා විහාරාධිපති ආචාර්ය අලුත්වැව සෝරත නාහිමියෝද සහභාගි වූහ.

පසුව එහි සිට රත්නපුර හරහා සංඛපාල විහාරය, සමන් දේවාලය ඔස්සේ අවිස්සාවේල්ල මාර්ගය හරහා නැවත ගංගාරාමයේ තැන්පත් කිරීමට කේශධාතුන් වහන්සේ රැගත් රිය පෙරහර ගමන් ගත්තේය. මාතර බෝධිය හා මාතර වෙහෙරහේන රජ මහා විහාරයේදී කේශධාතුන් වහන්සේ පිදූ අවස්ථා ඡායාරූප වලින් දැක්වේ.