පන්නිල ශ්‍රී ආනන්ද නා හිමියන්ගේ ශාසනික සමාජ මෙහෙවර
 

අත්තනගල්ල රාජ මහා විහාරාධිපති සීනාදී සිවු කෝරළයේ ප්‍රධාන සංඝනායක ආචාර්ය පන්නිල ශ්‍රී ආනන්ද නාහිමියන් දේශීය හා විදේශීය වශයෙන් ද ආගමික හා සමාජ සේවා රැසක නිරතව සිටින යතීන්ද්‍රයන් වහන්සේ නමකි.
සුනාමි විපත සිදු වූ අවස්ථාවේ මෙරට මහ සඟරුවන සිදු කළ මෙහෙවර සදානුස්මරණීයය. ඒ අතර ආචාර්ය පන්නිල ශ්‍රී ආනන්ද නාහිමියෝ් ද විදේශීය පරිත්‍යාග ශීලීන්ගේ සහ විදේශ ගත ශිෂ්‍ය හිමිවරුන්ගේ ද සහායෙන් සුනාමියෙන් අවතැන් වූවන් සඳහා නිවාස සිය ගණනක් විවිධ ප්‍රදේශයන්හි ඉදි කරවූහ.
ආනන්ද නාහිමියෝ විදේශීය දායක කාරකාදීන්ගේ ද දේශීය හා විදේශීය හිතවතුන්ගේ ද සහාය ලබා ගනිමින් වෙහෙර විහාර ඉදිකරවීමට ද පසුගිය වසරේ දායක වූහ. ඒ අතර තායිවානයේ පරිත්‍යාගශීලී දායක පින්වතුන්ගේ අනුග්‍රහයෙන් වල්ගම්මුල්ල බෝධිනන්දාරාමයේ සම්බුදු මැඳුර සහ කඹුරගොල්ල ශ්‍රී බෝධිරුක්ඛාරාමයේ සම්බුදු මැඳුර ද වතුපිටිවල ළදරු හා වැඩිහිටි නිවාසයේ බුදුමැඳුර ද ඉදිකරවූහ. අත්තනගල්ල හග්ගල්ල ශ්‍රී නාගවනාරාමයේ අභිනව සංඝාවාසය හා වතුපිටිවල ජේ.බී. ඔබේසේකර ආර්යා මූලික රෝහලේ ළදරු වාට්ටුවද ඉදිකරවූහ.